Тошкент вилояти ҳокимлиги кам таъминланган оилаларга 1 млрд сўм ажратди
Пул маблағлари вилоят маҳаллий бюджетидан қопланади. Вилоят ғазначилик бошқармаси эса ажратилган маблағ бўйича тўловларни ўз вақтида амалга оширилишини назоратга олади
Тошкент вилояти ҳокими Зойир Мирзаев ижтимоий ҳимояга муҳтож фуқароларни қўллаб-қувватлаш мақсадида «Саҳоват ва кўмак» жамғармаси маблағларини шакллантириш бўйича фармойиш имзолади. Ҳужжат матни E-qaror платформасида эълон қилинди.
Унга кўра, вилоят маҳаллий бюджетининг 2022 йил III чорак якуни билан шаклланган даромадлар режасининг орттириб бажарилган қисми ҳисобидан вилоятдаги ногиронлиги бўлган, кам таъминланган, ижтимоий ҳимояга муҳтож, уй-жойи таъмирталаб фуқароларни қўллаб-қувватлаш мақсадида вилоят маҳаллий буджетидан 1 миллиард сўм маблағ ажратилди.
Қайд этилишича, вилоят ҳокимлиги молия бош бошқармаси маблағ ажратиш бўйича «Давлат молиясини бошқариш ахборот тизими»да тегишли ўзгартиришлар киритилишини таъминлайди. Бундан ташқари, вилоят ғазначилик бошқармаси эса ажратилган маблағ бўйича тўловларни ўз вақтида амалга оширилишини назоратга олади.
Шунингдек, вилоят давлат молиявий назорати бошқармаси ажратилган маблағдан мақсадли фойдаланилишини текширади.
