Тошкент вилоятида коммунал учун ундирилган маблағлар сув таъминоти ходимлари томонидан «еб» юборилди
«Тошкент сув таъминоти»да истеъмолчиларга хизмат кўрсатиш ва сув сотиш бўлимининг 5 нафар ходими аҳолидан 153,5 млн сўм йиғиб олган. Улар фирибгарлик йўли билан қўлга киритилган пулларни ўз эҳтиёжларига сарфлаб юборган
Тошкент вилоти Ангрен шаҳрида сув истеъмоли учун йиғилган пулларни ўз эҳтиёжларига сарфлаб юборган назоратчилар аниқланди. Бу ҳақда Бош прокуратура ҳузуридаги департамент хабар берди.
Қайд этилишича, департаментнинг Ангрен шаҳар бўлими томонидан «Toshkent suv taʻminoti» МЧЖ Ангрен шаҳар бўлимининг мурожаатига асосан ўтказилган терговга қадар текширувда, ушбу бўлимнинг истеъмолчиларга хизмат кўрсатиш ва сув сотиш бўлими назоратчилари Ш.Б., А.И., Г.Э., М.Ш. ва С.Қ.лар аҳолидан сув истеъмоли учун жами 153,5 млн сўмни фирибгарлик йўли билан йиғиб олиб, ўз эҳтиёжларига сарфлаб юборганликлари аниқланган.
Мазкур ҳолат юзасидан Жиноят кодексининг 168-моддаси (фирибгарлик) билан жиноят иши қўзғатилиб, тергов ҳаракатлари ўтказилмоқда.
