Тошкентда 14 та йирик савдо комплекси ишга туширилади
Шавкат Мирзиёев мутасаддиларга йил якунига қадар пойтахтда 14 та йирик савдо комплексини ишга тушириш, шунингдек, 12 мингта савдо-сервис объектлари ташкил этишни таъминлаш вазифасини топширди
Шавкат Мирзиёев раислигидаги йиғилишда 2023 йилда пойтахтда аҳоли бандлигини таъминлаш масалалари муҳокама қилинди. Бу ҳақда Президент матбуот хизмати хабар берди.
Мазкур йиғилишда янги иш ўринларини яратиш бўйича улкан марраларга эришишда тадбиркорларга таяниш, уларни қўллаб-қувватлаш лозимлиги таъкидланди.
Жумладан, 2023 йили Тошкент шаҳрида хизматлар соҳасини ривожлантириш учун 20 триллион сўм кредит йўналтирилади, оилавий тадбиркорлик учун 300 миллиард сўм имтиёзли кредитлар ажратилади.
Мутасаддиларга йил якунига қадар:
- 14 та йирик савдо комплексини ишга тушириш, шунингдек, 12 мингта савдо-сервис объектлари ташкил этишни таъминлаш;
- 57 та меҳмонхона, 3,5 мингта умумий овқатланиш ва маҳаллаларда 7 мингта савдо-сервис объектларини ишга туширишга кўмаклашиш топширилди.
Аввалроқ Тошкент шаҳри ишсизликдан холи ҳудудга айлантирилиши ҳақида хабар берилганди. Бу бўйича Халқ депутатлари Тошкент шаҳар кенгашининг қарори эълон қилинган.