Тошкентда 2022 йили 7 нафар банк ходими коррупция билан боғлиқ жиноий жавобгарликка тортилди
Жиноят ишлари бўйича Тошкент шаҳар судлари томонидан 2022 йил давомида 12 141 нафар шахсга нисбатан 9807 та жиноят иши кўриб тамомланган. Хусусан, соҳалар бўйича коррупцияга оид кўриб тамомланган ишлар бўйича банк йўналишида 7 нафар шахс жиноий жавобгарликка тортилган
Жиноят ишлари бўйича Тошкент шаҳар судлари томонидан 2022 йил давомида 12 141 (2021 йилда — 9325) нафар шахсга нисбатан 9807 (7427) та жиноят ишлари кўриб тамомланган. Бу ҳақда Тошкент шаҳар суди матбуот хизмати хабар берди.
Маълум қилинишича, 2021 йилга нисбатан кўриб тамомланган ишлар сони 2380 тага (32 фоиз), жавобгарликка тортилган шахслар сони эса 2816 нафарга (30,2 фоиз) кўпайган.
Жиноят ишларининг 4851 таси ижтимоий хавфи катта бўлмаган, 2405 таси унча оғир бўлмаган, 4337 таси оғир ва 548 таси ўта оғир тоифадаги жиноятларни ташкил этган.
Соҳалар бўйича коррупцияга оид кўриб тамомланган ишлар бўйича шахслар тоифасида:
- соғлиқни сақлаш соҳасида 16 нафар шахс;
- таълим соҳасида 32 нафар шахс;
- банк йўналиши бўйича 7 нафар шахс жиноий жавобгарликка тортилган.
Шунингдек, судланган шахсларнинг 1063 (11,4 фоизи) нафарига жарима, 2398 (25,7 фоиз) нафарига ахлоқ тузатиш ишлари, 1713 (18,3 фоиз) нафарига озодликни чеклаш, 3710 (39,7 фоиз) нафарига озодликдан маҳрум қилиш, 121 (1,3 фоиз) нафарига мажбурий жамоат ишлари жазоси тайинланган бўлса, 331 (3,5 фоиз) нафар шахс шартли ҳукм қилинган.
Судланганларнинг:
- 1016 нафарини (10,8 фоиз) аёллар,
- 246 нафарини (2,6 фоиз) вояга етмаганлар,
- 381 нафарини (46,9 фоиз) ёшлар,
- 238 нафарини (2,5 фоиз) 60 ёшдан ошган эркаклар,
- 106 нафарини (1,1 фоиз) чет эл фуқаролари,
- 8 нафарини (00,8 фоиз) тадбиркорлар ташкил этган.
Муқаддам судланган 2245 киши томонидан такроран жиноят содир этилган.