Тошкентда 2023 йили электр энергиясига бўлган талаб 4 баравар ортиғи билан таъминланиши мумкин
Шавкат Мирзиёевнинг пойтахт жамоатчилик вакиллари ва мутасаддилар билан ўтган йиғилишда шаҳарда камида 2 минг мегаваттга яқин қувватли қуёш панелларини ўрнатиш мумкинлиги қайд этилди. Бу чоралар кўрилса, 2023 йилда кутилаётган талабни 4 баравар ортиғи билан таъминлаш имконияти пайдо бўлади
Шавкат Мирзиёев 8 февраль, чоршанба куни пойтахт жамоатчилик вакиллари ва мутасаддилар иштирокида йиғилиш ўтказди. Бу ҳақда Президент матбуот хизмати хабар берди.
Маълум қилинишича, йиғилишда Тошкент шаҳрининг электр энергияси ва табиий газга эҳтиёжи тобора ортиб бораётгани таъкидланиб, энергетика масалаларини тўлиқ ҳал қилиш учун барча ҳисоб-китоблар қилингани айтилди.
Авваламбор, қайта тикланувчи энергия салоҳиятидан фойдаланиш зарур.
Хусусан, шаҳарда камида 2 минг мегаваттга яқин қувватли қуёш панелларини ўрнатиш мумкинлиги қайд этилди. Бу ишлар билан кўп қаватли уйлар, ижтимоий соҳа объектлари, давлат идоралари ва тадбиркорлик биноларининг том қисми, саноат зоналари ҳудуди, автотураргоҳлар ва йирик сув иншоотлари ҳудудини қамраб олиш мумкин.
«Бу чоралар кўрилса, ҳисоб-китобларга кўра, 2023 йилда кутилаётган 240 миллион киловатт соатлик талабни 4 баравар ортиғи билан, яъни 1 миллиард 80 миллион киловатт соат ҳажмда таъминлаш имконияти пайдо бўлади», дейилади хабарда.
Аввалроқ Ўзбекистоннинг Гуанчжоудаги бош консулининг Далянь халқаро бизнес уюшмаси раҳбари билан учрашувида қуёш ва шамол энергиясини қайта ишлаш орқали «яшил» энергия ишлаб чиқариш ва уюшма таркибидаги ушбу йўналишда фаолият олиб борувчи компанияларни Ўзбекистонга жалб этиш юзасидан келишувга эришилгани ҳақида хабар берилганди.