Тошкентда 300 та чорраҳа йил охиригача рақамли тизимга ўтказилади
Соҳани рақамлаштириш билан боғлиқ барча масалага шаҳар мутасаддилари масъул бўлади.
Тошкент шаҳрида 300 та чорраҳа 2022 йил якунига қадар рақамли тизимга ўтказилади. Бу ҳақда Президент матбуот хизмати хабар берди.
Маълум қилинишича, Тошкент шаҳрида йўл ҳаракатини рақамли бошқариш ва хавфсизлигини таъминлаш тизимини жорий этиш тўлиқ шаҳар ҳокимияти тасарруфига ўтказилади.
Таъкидланишича, Президент томонидан 2022 йил якунига қадар пойтахтнинг 300 та чорраҳасини, келгуси йилда эса қолган 302 тасини рақамли тизимга ўтказиш вазифаси қўйилган.
Шунингдек, соҳани рақамлаштириш билан боғлиқ барча масалага шаҳар мутасаддилари жавоб беради ва сўров ҳам улардан бўлади. Ахборот технологиялари, Ички ишлар ва Транспорт вазирликларида ушбу тизимни такрорловчи ёки ишига аралашадиган бўлинмалар бўлиши мумкин эмас.
«Тошкент, Андижон, Наманган, Фарғона вилоятлари ҳокимларининг йўл ҳаракатини рақамли бошқаришни жорий этиш бўйича ‘йўл хариталари’ билан танишиб чиқдим. Уларда белгиланган тадбирлар фақат қоидабузарликнинг назорати билан чеклангани мени мутлақо қониқтирмайди», — деган Шавкат Мирзиёев.
Қайд этилишича, бир ой муддатда вилоят марказларида йўл ҳаракатини бошқариш ва хавфсизлигини таъминлаш бўйича янги концепцияларини ишлаб чиқиш вазифаси топширилган.
Аввалроқ Тошкентда 2022 йил қарийб 4 миллиард долларлик инвестиция ўзлаштирилиши хабар қилинганди. Шунингдек, Шавкат Мирзиёев Тошкентда амалга ошириладиган лойиҳалар билан танишгани ҳақида хабар берилди.