Транспорт вазирлигининг паст рентабелли давлат корхоналари хусусий секторга ўтказилади
Вазирлар Маҳкамасининг автотранспорт соҳасидаги давлат корхоналарини хусусийлаштиришга оид қарори қабул қилинди.
Ўзбекистонда Транспорт вазирлигининг паст рентабелли давлат корхоналари хусусий секторга ўтказилади. Бу ҳақда Norma хабар берди.
Маълум қилинишича, Вазирлар Маҳкамасининг 2 январдаги «Автомобиль транспорти соҳасида давлат иштирокидаги корхоналарга хусусий секторни жалб қилиш тўғрисида»ги қарори қабул қилинган.
Ҳужжат билан Транспорт вазирлигининг автомобиль транспорти соҳасидаги паст рентабелли давлат корхоналарини хусусий секторга инвестиция ва ижтимоий мажбуриятларни қабул қилиш шарти билан оммавий аукционлар орқали сотиш назарда тутилмоқда.
Қайд этилишича, «Электрон аукцион» электрон савдо майдонида сотиладиган корхоналар рўйхати тасдиқланган. Улар учун қуйидаги инвестиция ва ижтимоий мажбуриятлар белгиланган:
- иш фаолиятини камида 5 йил давомида жамоат транспорти соҳасида амалга ошириш ҳамда биринчи навбатда қишлоқ ҳудудларини туман ва вилоят марказлари билан боғловчи йўналишларда фаолият юритиш;
- бир йил муддатда иш фаолиятига замонавий ахборот-коммуникация технологияларини (GPS қурилмалари, электрон тўлов тизимлари) жорий этиш.
Шунингдек, Давлат активларини бошқариш агентлигига инвесторлар билан тегишли шартнома тузилишини ҳамда қабул қилинган инвестиция ва ижтимоий мажбуриятлар бажарилишини назорат қилишни таъминлаш топширилган. Ҳужжат қонун ҳужжатлари маълумотлари миллий базасида эълон қилинган ва 3 январдан кучга кирган.
Аввалроқ Ўзбекистонда «Асакабанк» хусусийлаштирилиши хабар қилинганди. Шунингдек, Ўзбекистонда сув объектларининг хусусий секторга берилиши мумкин бўлиши ҳақида хабар берилди.
