Туркияда «Ўзбек киноси куни» бўлиб ўтди
Табрик учун Ўзбекистон Кинематография агентлиги бош директори Фирдавс Абдухолиқов сўзга чиқди
Туркияда бўлиб ўтаётган «Korkut ata» халқаро кинофестивалида 8-12 ноябрь кунлари таниқли ўзбек киноижодкорлари ҳам иштирок этмоқда.
Кинофестиваль дастурида 11 ноябрь куни «Ўзбек киноси куни» ташкил этилди. Аввал «Ипак йўли дурдонаси» Тошкент халқаро кинофестивали ҳақида видеоролик тақдим этилди. Табрик учун Ўзбекистон Кинематография агентлиги бош директори Фирдавс Абдухолиқов ҳамда Туркия маданият ва туризм вазири ўринбосари Аҳмет Демиркан сўзга чиқди.
Кечада ўзбек миллий куй-қўшиқлари ва рақслари янгради. Маданий тадбир байрам тантанага айланиб кетди. Шунингдек, таниқли ўзбек кино ва эстрада юлдузларининг чиқишлари тақдим этилди. Сўнгра Кинематография агентлиги буюртмасига биноан суратга олинган режиссёр Рашид Маликовнинг «Тутқунлик» фильмининг премьераси бўлиб ўтди. Кечада ўзбек киноижодкорлари, Туркиядаги ватандошлар ва маҳаллий аҳоли ҳам иштирок этишди. Байрам барчага манзур бўлди.
Маълумот учун, кинофестивалда Ўзбекистон Кинематография агентлиги буюртмасига биноан суратга олинган режиссёр Али Ҳамроевнинг «Халқ жасорати», Жаҳонгир Аҳмедовнинг «Илҳақ» фильмлари ҳам намойиш этилди. 11 ноябрдан Туркия миллий телеканалларида кинофестивалда намойиш этилган ўзбек фильмларининг ТВ премьералари ҳам бошланди.
