Twitter акциядорлари компанияни Маск сотиб олишига рози — ОАВ
WSJ Twitter акциядорлари ижтимоий тармоқ Илон Маск томонидан сотиб олинишини маъқуллашга тайёр экани ҳақида хабар берди. Энг йирик акциядор — Маскнинг ўзи ҳали овоз бермаган, овоз бериши ҳам даргумон. Миллиардер келишувдан чиқишга ҳаракат қилмоқда.
Twitter акциядорлари компанияни миллиардер Илон Маск томонидан сотиб олинишини маъқуллашга тайёр. Бу ҳақда The Wall Street Journal акциядорларнинг муддатидан олдин овоз бериш натижаларига таяниб хабар бермоқда.
Twitter аввалроқ судга мурожаат қилиб, дунёнинг энг бой одамини ижтимоий тармоқни 44 миллиард долларга сотиб олиш бўйича келишувни бажаришга мажбур қилишни талаб қилган эди. Маскнинг ўзи ундан чиқишга ҳаракат қилмоқда.
Овоз бериш жараёни билан яқиндан таниш бўлган нашр суҳбатдошларига кўра, инвесторлар кўпчилик овоз билан битимни маъқулламоқда. 13 сентябрь, сешанба куни эрталабга белгиланган йиғилишда овоз бериш натижалари ўзгариши мумкин.
Баъзи манбаларга кўра, Twitter’нинг йирик акциядорлари, жумладан, Twitter акцияларининг тахминан 20 фоизини биргаликда назорат қилувчи индекс фонди менежерлари келишувни қўллаб-қувватлашга тайёр.
Маск компаниянинг деярли 10 фоиз акцияларига эга бўлган энг йирик акциядоридир.
«У ҳали овоз бермаган, келишув учун овоз бериши даргумон», — дейди манбалар.
Маск ва Twitter ўртасидаги келишувга кўра, миллиардер келишувни ёқлаб овоз бериши керак. Бироқ, агар tтарли миқдордаги инвесторлар битимни қўллаб-қувватласа, унинг ёрдами ҳал қилувчи аҳамиятга эга бўлмай қолади.
Twitter раҳбарияти апрель ойида Илон Маск тармоқни 44 миллиард долларга сотиб олмоқчи эканини айтган эди, бироқ май ойи ўрталарида миллиардер компания ҳақиқий фойдаланувчилар орасида бот ва спам-аккаунтларнинг улушини ошкор қилмагунча ҳеч қандай келишув бўлмаслигини билдирди.
Маскнинг фикрича, спам-ботлар ҳақиқий аккаунтларнинг 20-25 фоизидан ошиб кетиши мумкин. Маскнинг адвокатларига кўра, бундай маълумотлар бизнес фаолияти учун муҳим ҳисобланади. 8 июль куни Маск Twitter’ни харид қилишдан расман воз кечди ва компанияни бундан хабардор қилди.
Аввалроқ Илон Маск Twitter’ни сотиб олишни Владимир Путиннинг Ғалаба кунида сўзлаши кутилаётган нутқи туфайли секинлаштирган бўлиши мумкинлиги айтилди. «Путиннинг эртанги нутқи жуда муҳим. Агар биз учинчи жаҳон урушига яқинлашаётган бўлсак, Twitter’ни сотиб олишнинг нима кераги бор», — дея Маскнинг сўзларини келтирди Twitter адвокати.