Twitter вертикал видео функциясини ишга туширган сўнгги ижтимоий тармоқ бўлди. Бу ҳақда компаниянинг расмий аккаунтида сўз боради.

Маълум қилинишича, функция «умумий кўриниш» ёрлиғидан жой олган. Ҳозирда ушбу функция iOS ва Android операцион тизимларида инглиз тилида сўзлашувчи фойдаланувчилари бўлган баъзи мамлакатларда мавжуд.

Таҳлилчиларнинг фикрига кўра, янги функция TikTok муваффақиятини такрорлаш йўлида амалга оширилган навбатдаги уриниш эди. Вертикал видеолар, аллақачон, Instagram’да Reels, Snapchat’да Spotlight ва YouTube’да Shorts номлари остида пайдо бўлган. Netflix, Spotify ва Reddit ҳам бу форматда тажриба ўтказмоқда.

«Дам олиш, янги қизиқишларни топиш ва нима бўлаётганини кўриш учун янгиланган, шахсийлаштирилган Explore саҳифасини синовдан ўтказмоқдамиз», — дейди Twitter вакили TechCrunch’га берган интервьюсида.

Қайд этиш керакки, Twitter бу йил доимий равишда Spaces, Twitter Blue ва Tip Jar каби янги маҳсулот ҳамда функцияларни ишга тушириб келмоқда. Ушбу тенденция янги бош директор Параг Агравалнинг раҳбарлик даврида ҳам давом этиши кутилмоқда.

Аввалроқ ижтимоий тармоқ асосчиси Жек Дорси истеъфога чиққани, унинг ўрнига ҳиндистонлик Параг Агравал келгани хабар қилинганди. Шунингдек, ижтимоий тармоқ бошқарувидаги ўзгаришлардан сўнг, компанияда қайта ташкил этиш ишлари бошлангани ҳақида хабар берилган.