Илон Маск яширинча янги сарой қидирмоқда, буни тадбиркорнинг ўзи инкор этган. Бу ҳақда Wall Street Journal хабар берди.

Маълум қилинишича, SpaceX ва Tesla асосчиси Илон Маск ўз уйларини сотувга қўйганидан кейин яширинча янги уй қидира бошлаганини инкор қилган. Тадбиркор газетадаги мақола ёлғон эканини даъво қилмоқда.

Нашр маълумотларига кўра, миллиардер тахминан бир йилдан бери қиймати 12 миллион доллар турадиган қасрда яшаб келган. Маск аввалроқ SpaceX’дан ижарага олинган, уни йиғиш ва кўчириш мумкин бўлган кичик уйда яшашини айтганди.

Уйнинг майдони — тахминан 37 квадрат метр, нархи эса бор-йўғи 50 минг долларни ташкил этади. У Техас штатида, SpaceX ўз ракеталарини учириш билан шуғулланадиган жойдан унча узоқ бўлмаган ерда жойлашган.

Қайд этилишича, 2020 йилнинг май ойида Маск деярли барча мулкидан қутулишини эълон қилган. Бунинг сабабини миллиардер ўзини Марс ва Ерга бағишлаши, моддий қадриятлар эса уни пастга тортиши билан тушунтирган. У ўзининг барча мулкини сотишни бошлаган ва 2021 йил декабрь ойида охирги уйини сотган.

Таъкидланишича, Маск ҳақиқатан дўсти Кен Ҳауэрининг уйида яшайди. Улар PayPal’га асос солинганидан бери бир-бирини танийди. Ҳауэрининг уйи 740 квадрат метрдан ортиқ майдонда, Техаснинг Остин шаҳридаги махсус ҳудудда жойлашган. Масканда сузиш ҳавзаси, жакузи ва шахсий қайиқ тўхташ жойи мавжуд.

Бундан ташқари, Маск яширинча Остиндан ўзига уй қидирмоқда. Нашр манбаларига кўра, у аллақачон бир нечта риелторларни ёллаган ва вариантларни кўриб чиқмоқда. Улардан бири заргарлик буюмлари дизайнери Кендра Скоттнинг уйи бўлган. Бироқ келишув амалга ошмаган, чунки миллиардер бир неча бор квартирани кўриш учун келмаган.

Мақола эълон қилинганидан сўнг, Кен Ҳауэри бу ҳақиқат эмаслигини айтиб, газетага изоҳ бериб улгурган.

«WSJ мақоласи ёлғон. Мен у ерда яшамайман ва ҳеч қаердан уй сотиб олмоқчи эмасман», — деган Маскнинг ўзи.

Шунингдек, SpaceX раҳбари Twitter’да WSJ нашрига жавоб қайтарган. «Ҳўп, лекин [бу саройдаги] ёстиқ жилдлари қандай рангда? Биз бу муҳим тафсилотларни билишимиз керак!», деб ёзган бизнесмен пост остидаги изоҳларда.

Аввалроқ Илон Маск расман уйсиз қолгани ҳақида хабар берилганди. Шунингдек, Маск Безосга жакузида эмас, компанияда кўпроқ вақт ўтказишни маслаҳат бергани хабар қилинди.