Moody’s агентлиги Украина билан можаронинг кучайиши муносабати билан Ғарбнинг Россияга нисбатан қаттиқ санкциялари жорий этилган тақдирда энг кўп зарар кўрадиган МДҲ давлатларини маълум қилди. Бу ҳақда Forbes хабар берди.

Moody’s рейтинг агентлиги таҳлилчиларига кўра, МДҲ давлатлари орасида Россия-Украина можароси бўйича Беларусь, Қирғизистон, Тожикистон, Молдова ва Арманистон энг заиф давлатлар ҳисобланади.

Экспертларининг фикрича, агар Россияга қарши эҳтимолий санкциялар Россия иқтисодиётида жиддий секинлашувга олиб келмаса, МДҲ мамлакатлари учун можаро билан боғлиқ хавфлар нисбатан кичик бўлади. Агар санкциялар жорий этилса, бу МДҲ давлатларига Россия билан иқтисодий, молиявий ва энергетик алоқалари, шунингдек, заиф ликвидлиги ва ташқи мавқеини ҳисобга олган ҳолда турли каналлар орқали таъсир қилади.

Маълумотларга кўра, Беларусь салбий прогнозли B3 рейтингига эга. Қирғизистон, Тожикистон, Молдова барқарор прогнозли B3, Арманистон эса барқарор прогнозли Ba3 рейтингини олган. Россия Baa3 барқарор прогнозли инвестиция даражасидаги суверен рейтингга эга.

Таъкидланишича, Россияга қарши санкциялар пул ўтказмалари бўйича Россияга энг қарам бўлган МДҲ мамлакатларига салбий таъсир кўрсатади — булар Қирғизистон ва Тожикистондир. Россия иқтисодиётининг эҳтимолий секинлашиши Қирғизистон ва Тожикистоннинг кредит қобилиятига меҳнат муҳожирлари пул ўтказмаларининг қисқариши туфайли таъсир қилади. Жаҳон банки маълумотларига кўра, пул ўтказмалари ушбу мамлакатлар ялпи ички маҳсулотининг мос равишда 33 ва 30 фоизини ташкил қилади.

Шунингдек, рублнинг сезиларли даражада заифлашишига олиб келадиган кескинликнинг эҳтимолий кучайиши МДҲ мамлакатлари валюталарига салбий таъсир кўрсатиши ва ликвидлик хавфини ошириши мумкин, айниқса Беларусь, Тожикистон ва Грузия каби давлатларнинг қарз улуши юқоридир.

Базавий ҳолат деб ҳисобланмаган Россиядаги кескин иқтисодий пасайиш Беларусь учун ҳам муҳим иқтисодий оқибатларга олиб келади. Сабаби, Россия республиканинг энг йирик савдо шериги ҳисобланади — умумий экспортнинг 46 фоизи Россияга тўғри келади.

Шу билан бирга, Россия ҳукумати Украинага ҳужум қилиш ниятини рад этади. Ташқи ишлар вазири Сергей Лавров 14 февраль куни Владимир Путинга Россия ва АҚШ ўртасида Европада хавфсизлик кафолатлари бўйича мулоқот қилиш имкониятлари тугамаганини айтган.

Ўз навбатида, ўзини мустақил деб эълон қилган Донецк ва Луганск халқ республикалари (ДХР ва ЛХР) ҳукумати 18 февраль куни Украина томонидан ҳужум қилиш хавфи туфайли аҳолининг Россияга эвакуация қилинишини эълон қилган. Киев бундай режаларни рад этиб, можарони дипломатия йўли билан ҳал этиш ниятида эканини таъкидлаган.

Аввалроқ Россия ва Украина ўртасидаги кескинлик фонида рубль курси ва Москва биржаси индекси тушиб кетгани ҳақида хабар берилганди. Шунингдек, Россия Беларусга 3,5 миллиард долларлик ташқи қарзни қайтаришда ёрдам бериши хабар қилинди.