АҚШ Халқаро тараққиёт агентлиги (USAID) Ўзбекистонга Орол денгизида экотизимни тиклаш учун 1,6 миллион доллар ажратади. Бу ҳақда АҚШнинг Тошкентдаги элчихонаси расмий сайти хабар берди.

Ушбу ташаббус Орол денгизининг қуриган тубида экотизимларни қайта тиклаш (ERAS II) лойиҳасининг иккинчи босқичи доирасида амалга оширилиб, Орол денгизининг Ўзбекистон қисмида янги ўрмон экинларини ўтқазиш орқали ҳудудда ҳаво сифати ва яшаш шароитларини яхшилаш ҳамда иқлим ўзгаришига чидамлиликни оширишга йўналтирилади.

Бу Орол денгизининг шимолий қисми бўлмиш Қозоғистон ҳудудида аввал бошланган лойиҳа доирасида олиб борилаётган ишларнинг мантиқий давомидир. USAID, шунингдек, Оролбўйи минтақасида яшаш шароитларини яхшилаш ва экотизимларни тиклашга кўмаклашиш мақсадида икки томонлама ҳамкорликни ривожлантиришга ёрдам беради.

«Давлат ташаббусларини амалга ошириш учун зарур салоҳиятларни мустаҳкамлаш ва кўмаклар кўрсатиш – бу мавжуд ёндошувлардан бири бўлиб, у орқали Қўшма Штатлар Марказий Осиёда барқарор ривожланиш ва иқтисодий ўсиш учун ўз тажрибаларини бўлишишга интилади. Бу каби лойиҳалар халқлар ўртасида узоқ муддатли истиқболни кўзлаган ҳолда ҳамкорликни ривожлантиришга қаратилган бўлганидек, турмуш шароитини яхшилаш ва барқарорликни яратишга ҳам қаратилгандир», – деб таъкидлади USAID Марказий Осиёдаги Минтақавий миссиясининг Иқтисодий ривожланиш департаменти директори Лора Чисмо.

Аввалроқ USAID Ўзбекистонга коронавирусга қарши кураш учун ҳам 2,5 млн доллар ажратгани ҳақида хабар берилганди.