UzAuto Хитой билан ҳамкорликни кенгайтирмоқда
UzAuto «Тошкент Агро Трактор» МЧЖ вакили сифатида Хитойнинг Dongfeng компанияси билан корхона маҳсулотлари, эҳтиёт ва бутловчи қисмларни етказиб бериш ҳамда бошқа йўналишлар бўйича шартнома имзолади.
Ўзбекистон ва Хитой ўртасидаги Савдо-иқтисодий ҳамкорлик бўйича Ҳукуматлараро қўмитанинг 6-йиғилиши доирасида Ўзбекистон бош вазири Абдулла Арипов ҳамраислигида ва Хитой Коммунистик партияси Марказий қўмитасининг сиёсий бюроси аъзоси Гуо Шенгкун қишлоқ хўжалиги машинасозлиги соҳасида бир қатор муҳим ҳужжатларни имзолаш тўғрисида келишувга эришилди.
Хусусан, UzAuto ҳукуматлараро тадбир доирасида «Тошкент Агро Трактор» МЧЖ (ТАТ) вакили сифатида Хитойнинг Changzhou Dongfeng Agricultural Machinery Group Co. Ltd (Dongfeng) компанияси билан корхона маҳсулоти, эҳтиёт қисмлари ва бутловчи қисмларини етказиб бериш, шунингдек, Ўзбекистонда DF903H уч ғилдиракли тракторларни маҳаллийлаштириш дастурини амалга ошириш учун шартнома имзолади.
Шартнома доирасида Dongfeng компанияси «Тошкент Агро Трактор» бренди остида ўз маҳсулоти, эҳтиёт қисмлари ва бутловчи қисмларни сотиш ва экспорт қилиш бўйича эксклюзив ҳуқуқларни ТАТга ўтказади.
Шунингдек, Хитой компанияси томонидан Ўзбекистон ҳудудида кафолат ва сервис хизматини ташкил этишда кўмаклашиш бўйича келишувга эришилди. Ҳамкорликнинг кейинги босқичи Dongfeng маҳсулотларини маҳаллийлаштиришни ўз ичига олади.
Changzhou Dongfeng Agriculture Machinery Group Co. Ltd. Хитойнинг қишлоқ хўжалиги техникаларини ишлаб чиқарувчи энг йирик компанияси ҳисобланади. Компания тракторлар, дизел двигателлари, култиваторлар, комбайнлар ва тегишли деталларни тадқиқ қилиш, лойиҳалаш, қайта ишлаш, ишлаб чиқариш ва сотишга ихтисослашган.
Changzhou Dongfeng бренди остидаги қишлоқ хўжалиги техникалари бутун дунёда сотилади.
