UzAuto Motors Captiva-5 учун тўланган пулларни қайтаришни бошлади
Chevrolet Captiva-5 автомобили бўйича жами 461 та шартнома пули тўланган
UzAuto Motors Chevrolet Captiva-5 автомобилини етказиб бериш бўйича бекор қилинган шартномаларнинг маблағларини қайтаради ва компенсацияни амалга оширади. Бу ҳақда компания матбуот хизмати хабар берди.
Маълум қилинишича, Chevrolet Captiva-5 автомобили бўйича жами 461 та шартнома пули тўланган. Айни пайтда 207 нафар харидор Captiva-5 ўрнига бошқа автомобилни олишга қарор қилган. 161 нафари эса тўланган маблағни қайтарилиши учун ариза билан мурожаат қилган ва пулларини қайтариб олган. 41 нафар мижоз кечаги кундан бошлаб компенсация сифатида тақдим этилган 5 фоизлик тўлов суммасини олган.
UzAuto Motors компанияси 20 ноябрь санасида Chevrolet Captiva-5 автомобилларини етказиб бериш бўйича шартномалар тўхтатилгани ҳақида расмий баёнот берганди.
Баёнотда мижозлар мурожаатидан кейин 3 кун ичида тузилган шартномалар бўйича тўланган барча маблағлар тўлиқ қайтарилиши, шунингдек, компания қўшимча равишда олдиндан тўлов суммасининг 5 фоизини компенсация сифатида тақдим этилиши келтирилган.
Аввалроқ UzAuto Motors Lacetti ва Labo етказиб беришни 2 ойга кечиктириши ҳақида хабар берилганди.
