Uzbekistan Airports парвозларни кузатиш учун Telegram бот ишга туширди
Эндиликда авиапарвозларни реал вақт режимида кузатиб бориш мумкин. Шунингдек, ҳар бир йўловчи мавжуд рўйхат орқали аэропорт, терминал, учиб кетиш ёки учиб келиш ва ўзига керакли йўналишни танлаши мумкин
Uzbekistan Airports компанияси йўловчиларга қулайлик яратиш мақсадида тест режимида Telegram бот ишга туширди. Бу ҳақда компания матбуот хизмати хабар берди.
Қайд этилишича, ушбу Telegram бот ёрдамида реал вақт режимида барча халқаро ва ички рейслар, шунингдек, жадвалдаги ўзгаришлар ҳақида маълумот олиш мумкин. Ботни ишга туширган ҳар бир фойдаланувчи мавжуд рўйхатдан аэропорт, терминал, учиб кетиш ёки учиб келиш ва ўзига керакли йўналишни танлаши хамда маълумотга эга бўлиши мумкин.
Шундан сўнг, бот парвоз ҳақидаги маълумотларни кўрсатади: учиш вақти, рейс рақами, парвоз ҳолати ва йўналиши, ташувчи авиакомпания ва рўйхатдан ўтиш маълумотлари. Компания хабарида айтилишича, яқин келажакда функционалликни кенгайтириш режалаштирилмоқда.
Хусусан, парвозлар ҳолатининг ўзгарганлиги, пойтахт аэропорти терминаллари ўртасида қатновчи автобуслар жадвали, шунингдек, юқори даражадаги комфорт заллари учун масофавий тўловларни амалга ошириш имконияти жорий қилинади.
Таъкидланишича, Telegram бот ўзбек ва рус тилларида фаолият юритмоқда.
