Uzcard подкастерлар учун бизнес-инкубатор ишга туширади
Инкубация дастури 3–6 ой давом этади
Uzcard Ўзбекистон Марказий банки, IT-Park ҳамда Инновацион ривожланиш вазирлиги ҳузуридаги Инновацияларни жорий қилиш ва технологиялар трансфери миллий офиси билан ҳамкорликда HelloHosts — подкастерлар учун бизнес-инкубаторни ишга туширмоқда. Бу ҳақда компания матбуот хизмати хабар берди.
Қайд этилишича, мазкур лойиҳанинг мақсади аҳолининг молиявий саводхонлигини ошириш ҳамда рақамли молиявий хизматлардан фойдаланишни кенгайтириш, янги технологияларнинг афзалликлари шунингдек, улар билан боғлиқ хатарлар ҳақида фойдаланувчилар хабардорлигини оширишдир. Саралашнинг асосий мезони FinTech, банкинг, молиявий саводхонлик, стартап, бизнес, инвестиция, дастурлаш, таълим ва бошқа мавзуларни ёритишдан иборат.
Иштирокчилар қуйидаги имкониятларга эга бўлади:
- профессионал медиа-студиядан бепул фойдаланиш;
- монтажчи ва овоз режиссёриннинг бепул хизматлари;
- подкастларни яратиш бўйича бепул индивидуал тренинг;
- ApplePodcast, GooglePodcast, YandexMusic, YouTube ва Soundcloud каби платформаларда ўзининг подкаст каналини рўйхатдан ўтказишда ёрдам;
- ўз подкаст канали ёрдамида пул ишлаб топиш бўйича менторлик ва кўмак кўрсатиш;
- подкастларнинг тематик режасини тузишда ёрдам;
- ОАВда тарғиботни молиялаштириш.
HelloHosts инкубация дастурининг давомийлиги 3–6 ойни ташкил этиб, унинг натижаларига кўра танлов ўтказилади. Ғолиблар қимматбаҳо соврин сифатида ўз подкастларини мустақил давом эттиришлари учун техник-ускуналарга эга бўлади. Подкаст-инкубаторининг резидент иштирокчиларини саралаш, ташкилотчилар томонидан танлов асосида ўтказилади. 16 ёшдан катта бўлган барча хоҳловчилар лойиҳада иштирок этиш учун таклиф этилади.
Иштирок этиш учун 15 ноябрга қадар мазкур ҳавола орқали ғоянинг батафсил мазмуни ва контент моҳиятини тасвирлаб, ариза юбориш зарур.
Аввалроқ Нукусда ёшлар учун стартап ғоялар танловига ариза қабул қилиш бошлангани ҳақида хабар берилганди.