Volkswagen Россияда автомобиль ишлаб чиқариш ва мамлакатга экспорт қилишни тўхтатади
Вазиятдан зарар кўрадиган ходимларига компания қисқа муддатли нафақа ваъда қилди.
Volkswagen компанияси Россияга автомобиль экспортини ва мамлакатдаги иккита заводда ишлаб чиқаришни тўхтатишга қарор қилди. Бу ҳақда компания матбуот хизмати хабар берди.
Германиянинг Volkswagen Group автомобиль концерни Владимир Путиннинг Украинадаги «ҳарбий операцияси»га жавобан Россиянинг Калуга ва Нижний Новгороддаги заводларида ишлаб чиқаришни тўхтатишга қарор қилди. Қарор «кейинги огоҳлантиришга қадар» қабул қилинди.
Бундан ташқари, компания чет элдан Россияга автомобиллар экспортини зудлик билан тўхтатди. Ушбу қарордан таъсирланадиган Россиядаги барча ходимларга Volkswagen «қисқа муддатли нафақалар» тўлашни ваъда қилди. Уларга қанча миқдорда нафақа тўланиши Volkswagen гуруҳининг Twitter’даги постида айтилмаган.
Volkswagen Group’га Volkswagen, Skoda, Audi, Porsche, Bentley ва Ducati каби автомобиль брендлари киради.
Аввалроқ Mercedes-Benz Россияга автомобиль етказиб беришни тўхтатгани хабар қилинганди. Шунингдек, Jaguar ва Land Rover Россияга автомобиль етказиб беришни тўхтатгани ҳақида хабар берилди.
