Американинг Walmart ритейлери ҳайдовчисиз транспорт воситаларидан фойдаланган ҳолда маҳсулотлар етказиб беришни саккизта савдо нуқтасида йўлга қўйишни режалаштирмоқда. Бу ҳақда TechCrunch хабар берди.

Маълум қилинишича, компания автоном транспорт воситаси ёрдамида озиқ-овқат етказиб беришни Аризона штатининг Скоттсдейл яқинидаги Пима-Марикопа ҳинду жамиятида жойлашган дўконда синовдан ўтказмоқда.

Walmart учун ўзини ўзи бошқариладиган транспорт воситаси General Motors шўъба корхонаси Cruise томонидан тақдим этилган. Cruise’нинг штат ишлари бўйича менежери Картер Стерннинг сўзларига кўра, синовда Chevy Bolts электромобилидан фойдаланилмоқда.

«Лойиҳага янги чакана савдо нуқталарини улаш 2022 йилда бошланади. Уларнинг барчаси Аризона штатида жойлашган, аммо Walmart бошқа штатларга ҳайдовчисиз етказиб бериш хизматини кенгайтиришни режалаштирмоқда», — деган Стерн.

Маълумотларга кўра, Cruise учун Walmart ягона даромад манбаи ҳисобланади. Ҳайдовчисиз автомобиль операторининг аксарият операциялари Сан-Францискода жойлашган бўлса-да, Cruise бу штатда такси ёки етказиб бериш хизматлари учун ҳақ ололмайди. Сабаби, у Калифорния Давлат хизматлари комиссиясидан тегишли рухсатномага эга эмас.

Компания San Francisco Marin Food Bank ва SF New Deal билан ҳамкорликда бепул юк ташиш хизматларини тақдим этади. Маълумотларга кўра, Cruise аллақачон 113 минган ортиқ етказиб беришни амалга оширган.

Аввалроқ АҚШ ҳарбий вертолёти илк марта учувчисиз режимда парвоз қилгани ҳақида хабар берилганди. Шунингдек, Жанубий Кореяда ҳаво такси хизмати йўлга қўйилиши ҳақида хабар берилди.