Иқтисодий тадқиқотлар ва ислоҳотлар маркази «Янги Ўзбекистон»нинг 2022–2026 йилларга мўлжалланган тараққиёт стратегияси лойиҳасининг ижтимоий-иқтисодий жиҳатлари келтирилган инфографикани тақдим қилди.

Қайд этилишича, келгуси беш йилда аҳоли жон бошига ялпи ички маҳсулот ҳажми 1,6 баравар ошиши, 2030 йилга бориб аҳоли жон бошига тўғри келадиган даромад эса 4 минг долларга етиши кутилмоқда. Бунинг натижасида Ўзбекистон «ўртача даромад даражаси юқори бўлган давлатлар» қаторига кириши мумкин.

Стратегияга мувофиқ, 2023–2025 йилларда ўртача йиллик ЯИМ ўсиш суръати 6,5 фоизни ташкил этади. Шунингдек, иқтисодиётни кредитлашнинг йиллик ўсиш суръати 16–18 фоиз даражасида режалаштирилган. Йиллик инфляция даражасини 2022 йилдаги 9 фоиздан 2023 йилгача 5 фоизга босқичма-босқич пасайтириш кўзда тутилмоқда.

Шунингдек, 2023 йилдан бошлаб ялпи ички маҳсулотга нисбатан 3 фоиздан ошмаслиги керак бўлган давлат бюджети тақчиллигини камайтириш кўзда тутилмоқда. Фуқаролик бюджети қабул қилиниб, аҳоли таклифларидан келиб чиққан ҳолда ҳар бир туман бюджетининг 5 фоизи долзарб масалаларни ҳал этишга йўналтирилади.

Таъкидланишича, ички йўлларни таъмирлаш учун ажратилган маблағнинг 50 фоизи жамоатчилик фикридан келиб чиқиб тақсимланади. Шунингдек, йиллик ташқи қарзлар миқдори 4,5 миллиард доллардан ошмайди. Давлат қарзлари эса ялпи ички маҳсулотнинг 60 фоизидан паст бўлади.

Маълумот ўрнида, 2022–2026 йилларга мўлжалланган «Янги Ўзбекистон» ривожланиш стратегиясининг муҳокамаси 2022 йил 15 январгача давом этади.

Аввалроқ аҳолининг 2022 йилги инфляцион кутилмалари маълум бўлгани хабар қилинганди. Шунингдек, Депутатлар айрим маҳсулотларни ҚҚСдан озод қилувчи қонунни қабул қилгани ҳақида хабар берилди.