«Янгийўл ёғ-мой»нинг 56,32 фоиз давлат улуши сотувга қўйилди
Акциялар бошланғич нархи 81 млрд 907 млн 927 минг 163,12 сўмни ташкил этади
«Янгийўл ёғ-мой» устав капиталидаги давлат акция пакетлари биржа савдоларига чиқарилди. Бу ҳақда Давлат активларини бошқариш агентлиги хабар берди.
Маълум қилинишича, Ўзбекистон Президентининг 2020 йил 27 октябрдаги «Давлат иштирокидаги корхоналарни ислоҳ қилишни жадаллаштириш ҳамда давлат активларини хусусийлаштиришга оид чора-тадбирлар тўғрисида»ги фармонига мувофиқ, Давлат активларини бошқариш агентлигининг Тошкент вилояти ҳудудий бошқармаси томонидан «Янгийўл ёғ-мой» устав капиталидаги 56,32 фоиз давлат акция пакети «Тошкент» фонд биржаси орқали оммавий савдоларга чиқарилган.
Қайд этилишича, акция пакети савдолари «битта лот» тамойили асосида 2021 йил 16 декабрь куни «Тошкент» республика фонд биржасида ўтказилади. Акциялар сони 17 миллион 8225 дона, бошланғич нархи 81 миллиард 907 миллион 927 минг 163,12 сўмни ташкил этади. Объект манзили — Тошкент вилояти, Янгийўл шаҳри (Тошкент шаҳридан 20 километр узоқликда), умумий ер майдони — 10,8 гектар. Шундан, ишлаб чиқариш майдони — 15 минг 208 квадрат/метр, мавжуд бино-иншоотлар сони — 73 та.
Таъкидланишича, корхона чигит, кунгабоқар ва масхар уруғларидан ўсимлик ёғи ишлаб чиқаришга ихтисослашган. Барча коммуникация тармоқларига эга.
Аввалроқ «Сувмаш»нинг 47 фоиз акция пакети сотувга қўйилгани хабар қилинганди. Шунингдек, «Фарғонаазот»нинг устав капиталидаги акция пакетлари хусусийлаштирилиши ҳақида хабар берилди.
