YouTube монетизация учун NFT’дан фойдаланишга рухсат беради
Компания блоггерларга аудитория билан мулоқот қилишни ошириш учун кўпроқ имконият яратади.
YouTube контентни монетизация қилиш учун NFT технологиясидан фойдаланишга рухсат беради. Бу ҳақда компания блогида маълум қилинди.
Хабарга кўра, YouTube видеоҳостинги 2022 йилда ўз платформасида метаолам ишлаб чиқмоқчи эканини маълум қилган. Шунингдек, компания контентни монетизация қилиш учун блокчейн ва NFT токенларидан фойдаланишни режалаштирмоқда.
Маълум бўлишича, ҳостинг раҳбарияти блоггерлар учун аудитория билан мулоқот қилишни ошириш мақсадида кўпроқ имкониятлар қўшмоқчи.
«Биз блокчейн ва NFT каби янги технологиялар ижодкорларга ўз мухлислари билан мустаҳкам алоқалар ўрнатиш имконини беришига ишонамиз. Улар янги лойиҳалар устида ҳамкорлик қилишлари ва янги йўллар билан пул ишлашлари мумкин бўлади», дейилади пресс-релизда.
Таъкидланишича, янги технологиялардан фойдаланишга масъулият билан ёндашиш керак, аммо улар «ақл бовар қилмайдиган салоҳиятга эга». Метаолам ҳақида гап кетганда, ҳостинг раҳбарияти видеоларни кўриш қамровини оширишни хоҳлаётганини айтган. Хусусан, бу биринчи навбатда платформада чиқарилган ўйинларга таъсир қилади, уларни «янада интерактив ва жонлироқ» қилиш режалаштирилган.
Қайд этилишича, YouTube 2021 йилда энг кўп ташриф буюрилган ижтимоий тармоқлар рейтингида учинчи ўринни эгаллаган. 2021 йилнинг октябрь ойида видеоҳостинг конверсияларни ошириш учун янгиланган видео реклама форматини тақдим этган. YouTube, шунингдек, live commerce бозорига кирган: платформа фойдаланувчилари иловадан чиқмаган ҳолда харид қилиш имкониятига эга бўлган.
Маълумот ўрнида, NFT (Non Fungible Token) технологияси 2017 йилда Ethereum криптовалютасидаги ақлли шартномалар асосида яратилган. NFT токенлари ҳар қандай маҳсулот, унинг эгаси ва транзакциялари ҳақида шифрланган маълумотларни ўз ичига олган рақамли сертификатдир. Фойдаланувчи крипто ҳамёнига эга бўлиши ва рақамли контентни токенга айлантириш учун махсус платформага юклаши керак. NFT расмлар, мусиқа, видеолар3D моделлар, матн ва бошқалар кўринишида бўлиши мумкин.
Аввалроқ 2021 йил YouTube’да энг кўп пул топган дунёнинг 10 нафар блогери ҳақида хабар берилганди. Шунингдек, YouTube асосий ёлғон маълумот тарқатувчи платформалардан бири деб топилгани хабар қилинди.