Зафар Ҳошимов Ботир Орифжоновнинг LeBazar’даги улушини сотиб олди
Битим суммаси маълум эмас.
Тадбиркор Ботир Орифжонов LeBazar’даги ўз улушини Korzinka супермаркетлар тармоғи асосчиси Зафар Ҳошимовга сотди. Бу ҳақда Орифжонов ўзининг Facebook саҳифасида маълум қилди.
«Мен ўз улушимни Зафар Ҳошимовга сотиб, LeBazar таъсисчилигидан чиқдим», — дея ёзади Орифжонов.
Ўз навбатида, Зафар Ҳошимов ҳам Facebook саҳифасида ушбу харидни тасдиқловчи пост қолдирган. Бироқ ҳар икки томон битим суммаси ҳақида маълумот бермаган.
«Ўтган йилнинг охирида Ботир лойиҳадан чиқиш ҳақида қарор қабул қилди ва бугун биз унинг бизнесдаги улушини сотиб олишим тўғрисида шартнома имзоладик. Ажрашганимиздан қанчалик афсусланмайлик, биз ҳамкорларнинг бизнес устуворликлари турли соҳаларда ривожланиши мумкинлигини тушунамиз. Дўстлик, ўзаро ҳурмат ва ишонч мустаҳкам бўлиб қолаётгани жуда яхши», — деб ёзади тадбиркор.
Шунингдек, Ҳошимов Орифжоновни Ўзбекистон электрон тижоратининг «афсонаси» эканини қайд этган.
Аввалроқ Korzinka супермаркетлар тармоғи асосчиси Зафар Ҳошимов компаниясининг Маkro тармоғи билан ашаддий рақобатга киришишига ҳали анча борлигини таъкидлагани хабар қилинганди.