Шундай одамлар борки, оддий ходимдан бўлим бошлиғи даражасига тезда ўтиб, бир-икки йилдан сўнг директорликкача кўтарилади.

Шу билан биргаликда йиллар, ҳатто ўнлаб йиллар давомида битта лавозимда қолиб кетганлар ҳам топилади. Нафақага чиққач, улар ортга қараб, нима бўлганини тушунишга ҳаракат қилади: нима учун карьера қилмадим, имконият бор эди-ку, деб ўзларига ўзлари савол беради.

Шундай тақдирларни кўриб, кишида ҳаёт адолатли эмас деган туйғу пайдо бўлади. Аслида эса барчаси одамнинг ўзига боғлиқ.

Қуйида ҳаётда кўпроғига эришмоқчи бўлганлар учун қўл келиши мумкин бўлган «Бизнес эгалари мактаби» асосчиси Александр Висоцкийнинг 5 та маслаҳати ҳақида сўз боради. Ушбу маслаҳатлар мартаба зинапоясидан юқорига кўтарилишни, муваффақиятли карьера қилишни истаганларга ёрдам беради.

I маслаҳат

Ақл бовар қилмас натижаларга эришиш учун ҳаракат қилинг

Бу дунё ўз иши учун қайғурмайдиган ва иш куни тугашини кутадиган одамларга тўла. Бу ёмон ёндашув. Агар карьера қилишни истасангиз — ажойиб натижа кўрсатинг.

II маслаҳат

Раҳбарият билан мақсадларингиз ва режаларингиз ҳақида суҳбатлашинг

Раҳбариятга ривожланиш ва ўсиш истагингиз ҳақида маълум қилинг. Шуни унутмангки, раҳбарлар ҳам оддий одам, баъзида улар сизнинг устувор мақсадларингиз ва ҳаракатларингизни кўрмаслиги, билмаслиги мумкин. Эътиборни жалб қилиш зарар қилмайди. Яна бир жиҳат, раҳбариятда ҳам иқтидорли ва интилувчан етакчиларни шакллантириш вазифаси бор.

III маслаҳат

Мартаба кўтарилиши учун нима қилиш кераклиги ҳақида ўйлаб кўринг

Раҳбарлардан қандай билим ва кўникмалар сизни кейинги босқичга олиб чиқишини сўранг. Ташаббускор бўлинг: бўлим бошлиғи, департамент раҳбари қандай кўникмаларга эга бўлиши кераклигини сўранг.

Эҳтимол, раҳбарият конкрет бир кўникма ёки тажрибани талаб қилар. Лекин кўпинча сиз бошқарув бўйича маълум бир билим ва қобилиятга эга бўлишингиз керак.

Агар сиз тўғридан-тўғри сўрасангиз, уларнинг умидлари нима эканлигини аниқ билиб оласиз, шунингдек, ҳамма нарсага тайёргарлик кўриш учун етарли вақт ва ресурсларга эга бўласиз.

IV маслаҳат

Оммадан бир даража юқорироқ фикр юритинг

Агар компания иерархиясида юқори ўринни эгалламоқчи бўлсангиз, у ҳолда сиз кейинги қадамни ташлагандек фикрлашингиз ва ҳаракат қилишингиз керак.

Мисол учун, агар сиз ҳозир ишлаб чиқаришда битта бўлимнинг бошлиғи бўлсангиз, бутун ишлаб чиқариш тизимининг бошлиғидек фикр юритиб кўринг. Ечимларни таклиф қилинг, нимани яхшилаш мумкинлиги ҳақида ўйлаб кўринг, ғоялар беринг. Катта масъулиятни ўз зиммангизга олишдан қўрқманг.

V маслаҳат

Раҳбарият билан яхши муносабатлар ўрнатинг

Раҳбарият билан қулай ва ижобий муносабатлар ўрнатинг. Бир нарсани тушунинг, инсон компания иерархиясида қанча юқорида бўлса, у шунча кўп муаммоларга дуч келса. Шу сабабли, раҳбарларга муаммо билан эмас, ечим билан юзланиш керак.

Ҳеч ким ёқимсиз, қизиқ бўлмаган ва мулоқот қилиш ноқулай бўлган сальбий одамнинг лавозимини оширишни хоҳламайди. Бу ўзингизни ёқимли совғадек тутишингиз керак дегани эмас, шунчаки раҳбарлар билан конструктив ва ижобий мулоқот услубини сақланг.

Аввалроқ вақтни бошқариш бўйича Google экспертидан 3 та маслаҳат берилганди.