Ўзбекистонда коррупцияга қарши курашиш самарадорлигини рейтинг баҳолаш тизими жорий этилади. Бу ҳақда Norma хабар берди.

Маълум қилинишича, Президентнинг 12 январдаги «Коррупцияга қарши курашиш ишларининг самарадорлигини рейтинг баҳолаш тизимини жорий этиш чора-тадбирлари тўғрисида»ги қарори қабул қилинган.

Қарорга кўра, рейтинг баҳолаш қуйидаги бешта йўналиш бўйича белгиланган кўрсаткичлар асосида ўтказилади:

• давлат ташкилотларида коррупцияга қарши курашиш бўйича механизм ва ҳуқуқий асосларнинг яратилганлиги ва амалиётга татбиқ этилганлиги;
• коррупциявий хавф-хатарларни аниқлаш, баҳолаш ва уларни камайтириш бўйича тадбирларнинг амалга оширилганлиги;
• давлат ташкилотлари раҳбарларининг коррупцияга қарши муросасиз муносабатни кўрсатувчи хатти-ҳаракатларининг мавжудлиги;
• ходимларнинг коррупцияга қарши курашишга оид ички тартиб-таомиллардан хабардорлиги ҳамда ушбу соҳада билим ва кўникмаларини ошириш бўйича тадбирларнинг амалга оширилганлиги;
• коррупцияга қарши курашиш бўйича тегишли соҳа ёки тармоқ кесимида аҳолининг ҳуқуқий онги ва ҳуқуқий маданиятини юксалтириш, ушбу иллатга нисбатан муросасиз муносабатни шакллантиришга қаратилган тарғибот тадбирларининг самарадорлиги.

Қайд этилишича, 2022 йил 1 февралдан бошлаб рейтинг баҳолаш тизими, эксперимент тариқасида, ўз фаолиятида коррупцияга қарши менежмент тизимини жорий этаётган 26 та давлат ташкилоти фаолиятига, 2022 йил 1 июлдан бошлаб — барча давлат ташкилотлари фаолиятига жорий этилади.

Ҳужжат қонун ҳужжатлари маълумотлари миллий базасида эълон қилинган ва 13 январдан кучга кирган.

Аввалроқ Ўзбекистонда коррупция содир этган шахсларнинг давлат хизматига қабул қилинмаслиги белгиланиши ҳақида хабар берилганди. Шунингдек, Коррупцияга қарши курашиш агентлигига қўшимча ваколатлар берилгани хабар қилинди.