Ўзбекистон Марказий банки бир ойда 500 млн доллардан ортиқ АҚШ облигацияларини харид қилди
2024 йил май ойида Марказий банк тарихда биринчи марта хорижий давлат қимматли қоғозларига 35 млн доллар миқдорида инвестиция киритган эди.
Марказий банк ноябрь ойида 500 млн доллардан ортиқ АҚШ облигацияларини сотиб олди. Бу ҳақда регулятор маълумотларида келтирилган.
1 декабрь ҳолатига кўра, Ўзбекистон олтин-валута захираларида $1,52 млрдлик қимматли қоғозлар сақланмоқда. Ўтган ойга нисбатан уларнинг ҳажми $503,3 млнга, жорий йил бошидан эса 15 баробарга ошди.
Натижада қимматли қоғозларнинг регулятор расмий захираларидаги улуши 1,72% дан 2,49% гача ошди.
Ноябрь ойи охирида Марказий банк раиси ўринбосари Аброр Мирзо Олимов олтин-валюта захираларини янада диверсификация қилиш режалари ҳақида маълум қилганди. Хусусан, регулятор «қатъий белгиланган даромадли инструментларнинг кенгроқ доирасига» инвестиция киритмоқчи.
Улар орасида суверен облигациялар, трансмиллий ташкилотлар облигациялари, деривативлар ва бошқа юқори сифатли қимматли қоғозлар мавжуд. Бунда молиявий инструментлар «А» даражадан паст бўлмаган кредит рейтингига эга бўлиши лозим.
«Биз [олтин-валюта захираларини диверсификация қилишни] қатъий даромадли АҚШ ғазначилик облигацияларидан бошладик, чунки улар анъанавий равишда хатарсиз активлар ҳисобланади. Аммо бошқа воситалар ҳам мавжуд — корпоратив облигациялар, халқаро молия ташкилотларининг қоғозлари. Бундай турдаги облигацияларга инвестиция киритишни бошлаш учун биз автоматлаштиришнинг ИТ-тизимини интеграциялашни якунлашимиз керак», — деди Марказий банк раиси ўринбосари.
Аброр Мирзо Олимовнинг сўзларига кўра, Жаҳон банкининг RAMP дастури кўмагида активларни бошқариш бўйича дастурий ечимларни жорий этиш учун RFP (таклифлар сўрови) ишлаб чиқилган. «RFP’ни якунлаганимиздан сўнг, бошқа активларга сармоя киритишимиз мумкин бўлади», — дея хулоса қилди у.
2024 йил май ойида Марказий банк тарихда биринчи марта хорижий давлат қимматли қоғозларига 35 млн доллар миқдорида инвестиция киритган эди. Жаҳон банки кўмагида захираларни диверсификация қилиш учун инвестиция портфели шакллантирилди. Октабр ойида регулятор $65 млнлик АҚШ ғазначилик облигацияларини сотиб олди, ўтган йил якуни билан эса уларнинг ҳажми 101 млн доллардан ортиқни ташкил этди.
