Энг йирик компаниялар раҳбарларининг аксарияти (77 фоиз) жаҳон иқтисодиётидаги вазият яхшиланишига ишонмоқда. Бу ҳақда «Коммерсантъ» PwC консалтинг компаниясининг 2022 йилги кутилмалар бўйича тадқиқотига таяниб хабар берди.

Маълум қилинишича, раҳбарларнинг фақат 15 фоизи иқтисодий вазиятнинг ёмонлашишини кутмоқда. 2021 йили умумий прогноз деярли оптимистик бўлиб, унда 76 фоиз респондентлар глобал ЯИМ ўсишининг эҳтимолий тезлашиши ҳақида гапирганди.

Баъзи мамлакатларда раҳбарларнинг оптимизми 2021 йилга нисбатан пасайган. Жумладан, 2021 йилда америкалик раҳбарларнинг 70 фоизи иқтисодиётнинг тикланишига умид қилган, 2020 йилда эса бу кўрсаткич 88 фоизни ташкил этган.

Хитойда бу кўрсаткич 71 фоиздан 62 фоизга тушган. Консалтинг компанияси буни АҚШ ва Хитой инфляция, етказиб бериш занжиридаги узилишлар ва кўчмас мулк пуфаклари туфайли иқтисодий қийинчиликларга дуч келаётгани билан изоҳламоқда.

Шу билан бирга, кўплаб топ-менежерлар Америка бозорига ишонишади. Респондентларнинг 41 фоизи 2022 йилда компанияларнинг ўсиш истиқболлари бўйича АҚШ биринчи ўринда эканлигини айтган (2020 йилда 35 фоиз шундай фикрда эди).

Бундан ташқари, 2022 йил бизнес учун асосий таҳдидлар: кибер ва соғлиқ учун хавфлар — респондентларнинг мос равишда 49 ва 48 фоизи шундай деган. Молиявий сектор раҳбарларини киберхавфсизлик масалалари энг кўп ташвишга солмоқда (59 фоиз). Саноат ва истеъмолчи сегментида фақатгина 40 ва 39 фоиз киберҳужумлар ҳақида қайғуради.

Таъкидланишича, PwC 2021 йил октябрь-ноябрь ойларида 89 мамлакатдан 4500 нафар бош директорлар орасида сўров ўтказган.

Аввалроқ Жаҳон банки глобал иқтисодиёт ўсиши прогнозини пасайтиргани хабар қилинганди.