Қозоғистонлик тадбиркор Маргулан Сейсембаев мамлакатнинг собиқ Президенти Нурсултон Назарбоевнинг яқин қариндошлари ҳукумат лавозимларидан кетаётганини яхши тенденция сифатида баҳолаб, мамлакатда кичик ва ўрта бизнес учун янги имкониятлар пайдо бўлаётгани ҳақида фикр билдирди.

«Сўнгги кунларда собиқ Президентнинг яқинлари ўз лавозимларини қандай тарк этаётганини келажакка бўлган яхши умид билан кузатяпман. Ҳокимиятдаги лавозимлардан ташқари, халқ хўжалигининг энг муҳим соҳалари ҳам оила назорати остида эди», — дея ёзади бизнесмен ўзининг ижтимоий тармоқдаги профилида.

Тадбиркорнинг қайд этишича, Президент Тўқаевнинг «Самрук-Казина» холдингини тугатиш ёки хусусийлаштириш тўғрисидаги буйруғи ҳамда собиқ Президентнинг қариндошлари муҳим давлат лавозимларидан кетаётгани мамлакат кичик ва ўрта бизнеси учун жуда истиқболли кўринмоқда.

«Тасаввур қилинг, агар «Самрук-Казина» холдинги, Президентнинг сўзларига кўра, Қозоғистон ялпи ички маҳсулотининг 60 фоизини назорат қилса, менинг ҳисоб-китобларимга кўра, яна 25-27 фоизи «Самрук-Казина»га кирмайдиган йирик нефть ва металлургия компаниялари томонидан назорат қилинади. Маълум бўлишича, Қозоғистондаги бутун кичик ва ўрта бизнес ялпи ички маҳсулотнинг атиги 13-15 фоизини ташкил қилади», — дейди у.

Сейсембаевга кўра, ЯИМнинг 13-15 фоизи кичик ва ўрта бизнес учун жуда камдир.

«Бу жуда ҳам камдир. Бунинг сабаби шундаки, Қозоғистон иқтисодиётининг барча тармоқларида ё иқтисодий, ё сиёсий ёки қариндошлик монополиялар мавжуд. Агар собиқ Президентнинг яқинлари иқтисодни тарк этса ва «Самрук-Казина» ўзининг иштирокини камида ярмига қисқартирса, кичик ва ўрта бизнес қандай имкониятларга эга бўлишини тасаввур қила оласизми?», дея ёзади у.

Шунингдек, қозоғистонлик тадбиркор собиқ Президентнинг қариндошлари ёки «Самрук-Казина» билан муаммо бутунлай ҳал бўлиб қолмаслиги ҳақида фикр билдирган.

«Лекин… Кейин, навбатдаги муаммо пайдо бўлади. Бу давлат олдида кичик ва ўрта бизнес манфаатларини ҳимоя қилишдир. Шу ўринда мен «Атамекен» Миллий тадбиркорлар палатаси ҳақида гапирмоқчиман. Тимур Қулибоев палата раиси лавозимини тарк этди. Аммо бутун раҳбарият, бутун президиум унинг ҳимоячиларидир. Бу тузилма узоқ вақтдан бери бюрократик монополияга айланган», — дейди у.

Сейсембаев «Атамекен» масаласида ўз ечимини таклиф қилган.

«Шу боис, «Атамекен» раҳбарияти тўлиқ истеъфога чиқиши зарур, деб ўйлайман. Ўз кучи билан ҳалол муваффақиятга эришган мустақил ишбилармонлар «Атамекен» раҳбариятига жойлаштирилиши керак. Масалан, мен КазКО мустақил тадбиркорлар уюшмаси раиси Жумабек Жанйқуловни тавсия қиламан. Мен Жумабекни анчадан бери биламан, уларнинг уюшмаси аъзолари билан кўп марта гаплашганман. Менимча, бундай тадбиркорларнинг вақти келди», — дея ёзади у.

Аввалроқ Назарбоевнинг икки куёви йирик компаниялар раҳбарлигидан кетгани хабар қилинганди.