Ўзбекистон-Россия қўшма корхонаси 850 млн долларга «Газли» ерости газ омборхонасини модернизация қилади. Бу ҳақда «Ўзтрансгаз» корхонаси матбуот хизмати хабар берди.

Газ ва нефть конларини қўшимча қидириш ва қўшимча ўзлаштириш, шунингдек, Ўзбекистондаги энг йирик ЕГО иншоотида газ захирасини 3 дан 10 миллиард куб метргача ошириш Gazli Gas Storage компанияси томонидан амалга оширилади.

Компания 2018 йилда «Ўзбекнефтегаз» таркибига кирувчи «Нефтегазинвест» ва Россиянинг «Форус» компаниялари томонидан ташкил этилган. «Газли» омборхонасини реконструкция қилиш лойиҳасининг умумий қиймати 850 миллион долларга баҳоланмоқда.

«Газли» газ конидан Бухоро–Урал ва Марказий Осиё–Марказ магистраль газ қувурлари тортилган бўлиб, улар орқали Россияга газ етказиб бериш мумкин.

Аввалроқ Сардор Умурзоқов Россия иқтисодий ривожланиш вазири билан қўшма лойиҳаларни муҳокама қилгани хабар қилинганди.