Нобел мукофоти совриндори криптовалютани АҚШдаги ипотека инқирозига тенглаштирди
Пол Кругман рақамли актив эгаларининг 55 фоизи олий маълумотга эга эмаслигини иқтибос келтирган.
Нобел мукофоти совриндори Пол Кругман криптовалютани АҚШдаги ипотека инқирозига тенглаштирди. Бу ҳақда «Inc.» хабар берди.
Иқтисодиёт бўйича Нобел мукофоти совриндори Пол Кругман криптовалюта бозорининг ўзгарувчанлигини 2007–2008 йиллардаги АҚШ ипотека инқирози билан таққослаб, ундан огоҳлантирган. Иқтисодчи буни криптовалюталарнинг у билан боғлиқ иқтисодий хавфлардан тўлиқ хабардор бўлмаган одамлар орасида машҳур бўлиб кетгани билан изоҳлаган.
«15 йиллик ипотека инқирозининг ташвишли акс-садолари бор», деган Кругман New York Times газетасида чоп этилган мақоласида.
Кругманнинг таъкидлашича, у криптовалюталар ва бутун уй-жой бозорини тиз чўктирган ҳамда 2007–2008 йиллардаги глобал молиявий инқирозни келтириб чиқарган АҚШ ипотека инқирози ўртасида «ноқулай параллелликларни» кўрмоқда.
Унга кўра, ипотека инқирози, асосан, фоиз ставкалари паст бўлган ва уй-жой нархлари осмонга кўтарилган бир пайтда банкларнинг юқори хавф гуруҳига кирувчи одамларга кредит бериши натижасидир. Бозор тўйингач, уй эгалари салбий соф қийматга эга бўлган ва кредитларини тўлай олмаган. Бу эса кредиторлар учун катта йўқотишларга олиб келган.
Кругманнинг қайд этишича, спекулятив молиявий маҳсулотларга сармоя киритган крипто-инвесторлар ҳақиқий хавфларни тушунмайди. Иқтисодчи рақамли активлар эгаларининг 55 фоизи олий маълумотга эга эмаслигини ҳақидаги NORC тадқиқотини мисол сифатида кўрсатган. Кругман сўров натижаларини криптовалюталарга сармоя киритиш ишчилар синфи орасида машҳур бўлиб кетганининг исботи сифатида келтирган.
«Кўплаб қарз олувчилар нимага киришаётганини тушунмади. Криптовалюталар эса ўзларининг гўёки асосий омилларга боғлиқ бўлмаган катта нарх ўзгаришлари билан тахмин қилиб бўлмас даражада хавфлидир», — дейди иқтисодчи мақоласида.
Бироқ, бугунги кунга келиб, криптовалюталар тизимли хавф туғдирмайди, деб ҳисоблайди Кругман. Унингча, рақамлар буни ҳақиқатда амалга ошириш учун етарлича катта эмас. CoinGecko маълумотларига кўра, бутун крипто бозори тахминан 1,7 триллион долларни ташкил қилади.
Аввалроқ Марк Цукерберг ўзининг криптовалюта лойиҳасини тўхтатиши хабар қилинганди. Шунингдек, Жаҳон криптовалюта бозори бир суткада 130 миллиард доллар йўқотгани ҳақида хабар берилди.
