Кинематография агентлиги бош директори Фирдавс Абдухолиқовга нисбатан маъмурий ҳуқуқбузарлик тўғрисида иш қўзғатилди. Бу ҳақда бош прокурорнинг матбуот котиби Ҳаёт Шамсутдинов Kommers.uz’га маълум қилди.

Коррупцияга қарши курашиш агентлиги тақдим этган ҳужжатлар Бош прокуратура томонидан ўрганиб чиқилган ва маъмурий ҳуқуқбузарлик тўғрисида иш қўзғатилган.

Маъмурий иш белгиланган тартибда кўриб чиқиш учун 25 январь куни жиноят ишлари бўйича судга юборилган. Бош прокуратура расмийси Абдухолиқовга МЖтКнинг айнан қайси моддаси қўлланганини очиқламади.

Айни вақтда ОАВда мазкур ҳолатда Абдухолиқовга нисбатан МЖтКнинг 175-8-моддаси (Давлат харидлари тўғрисидаги қонунчиликни бузиш) бўйича иш қўзғатилган бўлиши мумкинлиги ҳақида хабарлар тарқалмоқда.

Мазкур модданинг 4-қисмига кўра, давлат харидлари жараёнидаги аффилланганлик ва манфаатлар тўқнашуви ҳақида давлат харидлари тўғрисидаги қонунчиликда белгиланган тартибда хабар бермаслик мансабдор шахсларга БҲМнинг 20 бараваридан 30 бараваригача (5,4 миллиондан 8,1 миллион сўмгача) миқдорда жарима солишга сабаб бўлади.

Маълумот ўрнида, Миллий масс-медиани қўллаб-қувватлаш ва ривожлантириш жамоат фонди Васийлик кенгаши раиси ўринбосари Саида Мирзиёева «Sevimli» телеканали орқали эфирга узатилаётган «Сабрия» сериали ҳақида ўз фикрини билдириб, танқид қилган эди.

Кейинчалик Амира Рашидова сериал реал ҳаётдан олинганини айтиб, танқидларга жавоб қайтарган. Шундан сўнг ижтимоий тармоқларда журналист Саида Мирзиёеванинг фикрига қарши чиққани ҳақида хабарлар тарқалди. Амира Рашидова бу унга нисбатан қилинаётган иккинчи туҳмат эканини айтиб, Саида Мирзиёевага қарши эмаслигини таъкидлади. Кейинроқ Кинематография агентлиги бош директори миллий сериаллар ҳақида гапирди.