Қозоғистон Президенти Қосим-Жўмарт Тўқаевнинг жияни Каниш Избастин «КазАгроФинанс» компанияси директорлар кенгаши раиси лавозимидан кетди. Бу ҳақда Қозоғистон фонд биржаси матбуот хизмати хабар берди.

«Облигациялари Қозоғистон фонд биржасининг (KASE) расмий рўйхатида бўлган «КазАгроФинанс» АЖ (Нур-Султон), KASE’га ягона акциядорнинг 2022 йил 26 январдаги қарори билан директорлар кенгаши раиси — Каниш Избастин директорлар кенгаши таркибидан чиқарилди», дейилади биржа веб-сайтидаги хабарда.

Киритилган ўзгартиришлар билан директорлар кенгаши таркибига: Ойгул Жуанишбаева, Алия Мурзагалиева, Сержан Мадиев, Руслан Ўразбоев, Айдар Прашев киради.

Избастин 2015 йилдан 2021 йилгача «КазАгроФинанс»га раҳбарлик қилган. 2021 йил март ойидан буён «Байтерек» ҳолдинги бошқаруви раисининг биринчи ўринбосари бўлган ва 2022 йил 14 январда ушбу лавозимни тарк этган.

Каниш Избастин 1981 йилда туғилган, Қозоғистон фуқароси, 2021 йил март ойида «‘Байтерек»’ Миллий бошқарувчи ҳолдинг» АЖ бошқаруви раисининг биринчи ўринбосари этиб тайинланган. Қишлоқ хўжалиги активларини бошқариш ва агросаноат комплекси лойиҳаларини мониторинг қилиш бўйича раҳбарлик қилган.

Қозоғистон Ташқи ишлар вазирлиги тизимида, Қозоғистон Президенти маъмуриятида турли лавозимларда ишлаган. Бундан ташқари, қуйидаги лавозимларда фаолият юритган:

• 2007 йилнинг апрелидан 2008 йилнинг апрелигача — «БРК-Лизинг» АЖ бошқаруви раиси ўринбосари;
• 2008 йил апрелдан 2012 йил майгача — «БРК-Лизинг» АЖ бошқаруви раиси;
• 2012 йил май ойидан ноябрь ойигача — «‘КазЭкспортГарант’ экспорт-кредит суғурта корпорацияси» АЖ бошқаруви раиси;
• 2013 йил январидан 2015 йил сентябригача — «‘Самрук-Казына’ Миллий фаровонлик жамғармаси» АК бошқарувчи директори;
• 2015 йил 3 сентябрдан 2021 йил мартигача — «КазАгроФинанс» АЖ бошқаруви раиси;
• 2021 йил март ойидан — «‘Байтерек»’ Миллий бошқарувчи ҳолдинг» АЖ бошқаруви раисининг биринчи ўринбосари.

Қайд этилишича, 2001 йилда Россия Ташқи ишлар вазирлигининг Москва давлат халқаро муносабатлар институтини тамомлаган, Халқаро ҳуқуқ факультетини хорижий тилларни билган ҳолда ҳуқуқшунослик бакалавриати, Марказий Осиё университети жаҳон иқтисодиёти йўналиши битирувчиси, халқаро иқтисодчи, 2005 йилда Москва давлат халқаро муносабатлар институтини тамомлаган, фанлар номзоди.

Таъкидланишича, 27 январь куни Каниш Избастиннинг укаси Муҳаммад Избастин «Қозоғистон халқига» жамғармасига 100 миллион тенге ўтказгани маълум бўлган.

Муҳаммад ва Каниш Избастиннинг отаси — Қозоғистоннинг Болгариядаги Фавқулодда ва мухтор элчиси Темиртай Избастин, онаси — Карлига Избастин, мамлакат Президенти Қосим-Жўмарт Тўқаевнинг синглиси.

Аввалроқ Назарбоевнинг куёви яна «Газпром» директорлар кенгашига номзод сифатида кўрсатилгани хабар қилинганди.