Жанубий Кореянинг Samsung компанияси Galaxy for the planet дастури доирасида ташлаб кетилган балиқ овлаш тўрларидан смартфонлар ишлаб чиқаришни бошлайди. Бу ҳақда компания ўз сайтида маълум қилди.

Қайд этилишича, 9 февралда намойиш этиладиган янги Galaxy қурилмаларидан бошлаб, барча Samsung маҳсулотлари қайта ишланган океан пластмассаси ёрдамида яратилади.

Маълум қилинишича, ҳар йили океанга 640 минг тонна балиқ овлаш тўрлари ташлаб юборилади. Бу маржонлар ва денгиз ҳайвонларининг табиий яшаш жойларига зарар етказади, шунингдек, инсонлар истеъмол қиладиган денгиз маҳсулотларига ҳам таъсир кўрсатмоқда.

Samsung бир марталик пластмассалардан воз кечишини ва келажакда экологик тоза материаллар, жумладан, қайта ишланадиган маҳсулотлар миқдорини оширишни режалаштираётганини қўшимча қилган.

2021 йилда компания маҳсулот қадоқларининг айрим турларини қайта лойиҳалаш, шунингдек, деярли 5 миллион тонна электрон чиқиндиларни йиғиш ва саноат чиқиндиларининг 95 фоизини қайта ишлаш орқали пластмассадан фойдаланишни 20 фоизга қисқартирган.

Бундан ташқари, компания АҚШ, Европа ва Хитойда тўлиқ қайта тикланадиган энергия манбаларидан фойдаланади ва шунингдек, Carbon Trust Standard доирасида углерод чиқиндиларини камайтириш устида ишламоқда.

Аввалроқ Samsung глобал яримўтказгич инқирозидан рекорд даражада фойда кўргани хабар қилинганди.