Европа Иттифоқи АҚШ ва бошқа давлатлар билан Европага газ етказиб бериш ҳажмини ошириш бўйича музокаралар олиб бормоқда. Бу ҳақда Еврокомиссия раиси Урсула фон дер Ляйен маълум қилди.

Қайд этилишича, расмий Брюссель Вашингтон билан энергетика хавфсизлиги соҳасида ҳамкорликни йўлга қўймоқда.

«Биз Қўшма Штатлар билан энергия хавфсизлиги бўйича ҳамкорликни қурмоқдамиз, бу биринчи навбатда суюлтирилган газ етказиб беришни кўпайтиришга қаратилган», — дейди фон дер Ляйен хоним матбуот анжуманида.

Фон дер Ляйен Норвегия каби бошқа газ етказиб берувчилар билан ҳам Европани энергия манбаси билан таъминлаш бўйича музокаралар олиб борилаётганини қўшимча қилган.

Ғарб давлатлари ва Москва ўртасидаги кескинликнинг кучайиши фонида Россия газини Европага етказиб бериш борасида хавотирлар пайдо бўлди. АҚШ муқобил етказиб бериш йўлларини ўрганмоқда. Шунингдек, Вашингтон ва Брюссел бошқалар қаторида Украинанинг ҳам энергия хавфсизлигини таъминлашни мақсад қилган.

7 февраль куни Россиянинг «Газпром» компанияси 2022 йилнинг иккинчи ва учинчи чоракларида Польша орқали Германияга газ етказиб бериш учун Ямал-Европа газ қувурининг қувватларини банд қилмади. Компания, шунингдек, Украина орқали қўшимча газ транзитини ҳам бронь қилмади.

Аввалроқ Европадаги газ омборлари 85 фоизга бўшагани хабар қилинганди.