Ғарб давлатлари сўнгги ойларда Украинага умумий қиймати 1,5 миллиард долларлик ёрдам юборди. Бу ҳақда Украина ташқи ишлар вазири Дмитрий Кулеба маълум қилди.

Таъкидланишича, мамлакатга сўнгги ойларда минг тоннадан ортиқ қурол ҳам келган.

«Украинага халқаро ёрдам сиёсий, иқтисодий ва хавфсизлик нуқтаи назаридан ортди. Шу ҳафталар ва ойлар давомида биз 1,5 миллиард доллардан ортиқ маблағ олдик, етказиб берилган қурол-яроғ ва ҳарбий техника ҳажми эса минг тоннадан ортиқ», — дейди Кулеба матбуот анжуманида.

Украиналик дипломатнинг сўзларига кўра, хорижий делегацияларнинг Киевга ташрифи «Россияни ушлаб туришга» ёрдам беради. Унинг қайд этишича, 8 февраль куни Франция Президенти Эммануэль Макрон билан учрашувда Украина расмийлари мамлакат қуролли кучларини мустаҳкамлаш масаласини муҳокама қилиш ниятида. Дипломат Киевда Германия Ташқи ишлар вазирлиги раҳбари билан Украинага қурол етказиб бериш масаласини ҳам муҳокама қилишни кутмоқда.

Reuters нашрининг ёзишича, Украина 2021 йил мудофаа учун 4,3 миллиард доллар сарфлаган. Россиянинг ўтган йилги ҳарбий харажатлари эса 40 миллиард долларга тенг бўлди.

Маълумот учун, бугунги кунда Россия ва Украина уруш ҳолатида турибди. Ғарб ОАВнинг ёзишича, Россия ғарбий қўшнисига ҳужум қилиши мумкин: агрессия Қрим, Россия ва Беларусь тарафдан амалга оширилиши айтилмоқда. Ўз навбатида, АҚШ ва НАТО кучлари қурол етказиб бериш учун Украинага «ҳаво кўприги»ни ташкиллаштирган.