«Ўзбекистон республика товар-хом ашё биржаси» очиқ савдоларида 31 январь–6 февраль кунлари жами 1 триллион 978,9 миллиард сўмлик товар ресурслари сотилди. Бу ҳақда биржа матбуот хизмати хабар берди.

Сотувчи корхоналар маҳсулотларни тасдиқланган жадвалларга риоя қилган ҳолда биржа савдоларига қўйган. Ўтган ҳафтада биржа савдоларида 1261,0 тонна пахта ёғи сотилган. Ўтказилган савдоларда ҳар куни ўртача 47 харидор иштирок этган. Ўртача кунлик сотув ҳажмлари 252,0 тоннани ташкил қилган.

Кўриб чиқилаётган даврда барча навли пахта ёғининг кунлик ўртача нархлари маҳсулотнинг бир тоннаси учун 14 миллион 701,2 минг сўмдан 13 миллион 48,8 минг сўмгача, яъни 11,2 фоизга пасайган.

Шунингдек, биржанинг шакар бозорида нархлар пасайиши қайд этилган. Ҳафта давомида биржа савдоларига 16 минг 677,0 тонна шакар қўйилган ва улардан 8260,0 тоннаси, яъни 49,5 фоиз қисми сотилган. Ўтказилган савдоларда ҳар куни ўртача 33 харидор иштирок этган.

Кўриб чиқилаётган даврда шакарнинг барча категорияси бўйича шаклланган кунлик ўртача нархлар маҳсулотнинг бир тоннаси учун 8094,0 минг сўмдан 8082,5 минг сўмгача пасайган.

Ўтказилган биржа савдолари натижасида маҳаллий шакарнинг ТС-2 категорияси бўйича шаклланган ўртача ҳафталик нархи маҳсулотнинг бир тоннаси учун 8172,8 минг сўмни ташкил этган.

Бундан ташқари, ўтган ҳафта мобайнида биржа савдоларига 4713,0 тонна кўмир сотилган. Кўмирнинг ўртача кунлик сотув ҳажмлари 943,0 тоннани ташкил қилган.

Кўриб чиқилаётган даврда кўмир бўйича шаклланган кунлик ўртача нархлар маҳсулотнинг бир тоннаси учун 303,7 минг сўмдан 280,9 минг сўмгача, яъни 7,5 фоизга пасайди.

Ўтказилган биржа савдолари натижасида кўмир бўйича шаклланган ўртача ҳафталик нархи маҳсулотнинг бир тоннаси учун 347,4 минг сўмни ташкил этган.

Аввалроқ Ўзбекистон энг кўп шакар импорт қилаётган 5 та давлат ҳақида хабар берилганди. Шунингдек, Дунё бўйича озиқ-овқат нархлари ўсиши тезлашгани хабар қилинди.