Polestar электромобиль стартапи ўз рекламасида Tesla ва Volkswagen’ни масхара қилди. Бу ҳақда CNBC хабар берди.

Американинг электромобиллар ишлаб чиқарувчи Polestar компанияси Super Bowl Америка футбол чемпионати финали рекламасини намойиш этган ва унда рақиблари Tesla ва Volkswagen’ни масхара қилган.

Видео 30 сония давом этади ва «Муросасиз» деб номланади. Унда компания ўзининг янги Polestar 2 электромобилини тақдим этади ва ўз бизнесида нималардан қочишини санаб ўтади: «ифлос сирларга — йўқ», «бўш ваъдаларга — йўқ», «эпик овозга —йўқ» ва ҳоказо.

Компания шунингдек, «дизельгейт» ва «Марсни забт этиш» ҳақида ҳам эслатиб ўтади. Биринчиси, Volkswagen’нинг дизель ёқилғиси билан боғлиқ можарога ишора бўлса, иккинчиси Tesla раҳбари — 2026 йилгача Марсни забт этишни режалаштираётган Илон Маскга оид камситиш. Реклама «No. 2» (2-рақам) ва Polestar 2 тасвири билан якунланади.

«Super Bowl — бу ажойиб воқеа ва мен Polestar хабарини кенгроқ аудиторияга етказишдан хурсандман. Биз ёш ва умидли брендмиз. Биз дизайнимиз, барқарорлик борасидаги саъй-ҳаракатларимиз ва транспорт воситаларимизнинг ишлаши билан ҳеч қандай муросага келмаслигига ишонамиз», — деган Polestar бош директори Томас Ингенлат.

Маълумот ўрнида, Polestar 2022 йилнинг биринчи ярмида IPO савдосини ўтказишни режалаштирмоқда. У Volvo Cars ва унинг эгаси Geely Automobile томонидан бошқарилади.

Аввалроқ Tesla яна ярим миллиондан ортиқ электромобилни «чақириб олиши» хабар қилинганди. Шунингдек, Volkswagen Kombi микроавтобусининг замонавий версиясини тақдим қилгани ҳақида хабар берилди.