Ўзбекистонда қўй ва эчки хариди учун 5 йилгача кредитлар ажратилади
Йил якунига қадар наслли қўй кўпайтириш бўйича 133 та лойиҳани ишга тушириш вазифаси қўйилди.
Қўй ва эчки хариди учун 5 йилгача, сут, гўшт ҳамда жунни қайта ишлаш учун 10 йилга кредитлар ажратилади. Бу ҳақда Президент йиғилишида таъкидланди.
Йиғилишда қўй-эчкилар сонини кескин кўпайтириб, аҳолини жундан маҳсулот тўқиб, даромад топишга рағбатлантириш учун Ангрен, Косон, Ромитан ва Навбаҳордаги кооперация бўйича намунали тажрибалар кўрсатиб ўтилган ва уларни икки ой муддатда 60 та туманда йўлга қўйиш топшириғи берилган.
Йил якунига қадар наслли қўй кўпайтириш бўйича 133 та лойиҳани ишга тушириш вазифаси қўйилди. Бунда:
- жун ва сут йўналишида наслли қўй ва эчки харид қилиш учун 5 йилгача 3 йил имтиёзли давр билан;
- чорвачилик хўжаликлари томонидан аҳоли хонадонларидан жун ва сут маҳсулотларини сотиб олишга 12 ойгача 9 ой имтиёзли давр билан;
- ем озуқа, шунингдек сут, гўшт ва жунни қайта ишлаш цехларини ташкил этишга 10 йил муддатга 3 йил имтиёзли давр билан кредитлар ажратилади.
Аҳолига ушбу кредитлар ҳоким ёрдамчилари тавсияси асосида 50 миллион сўмгача гаров таъминотисиз ажратилади, кредит фоизининг ярмини қоплашга компенсация берилади.
Аввалроқ Ўзбекистонда қишлоқ хўжалиги бўйича 3 та ҳудуд тажрибаси учун 10 йиллик хорижий кредитлар ажратилиши хабар қилинганди.
