Comex биржасида 17 февраль куни олтин нархи 1,4 фоизга ошиб, бир унция учун 1900 долларни ташкил қилди. Бу 2021 йилнинг июнь ойидан бери кузатилган энг юқори кўрсаткичдир. Бу ҳақда MarketWatch хабар берди.

Қайд этилишича, апрель ойидаги олтин фьючерслари 1,4 фоизга ошиб, бир унция учун 1898 долларни ташкил қилган. Comex биржасидаги савдолар давомида эса котировкалар унция учун 1900 доллардан ошган.

Таҳлилчилар олтин нархининг кўтарилишини Россия ва Украина ўртасидаги навбатдаги кескинлик ва қуролли можаро бошланиш хавфи билан изоҳлайди. Бу кескинликнинг ошиши мудофаа активларига, жумладан қимматбаҳо металларга бўлган талабни оширади.

Ўз навбатида, Донецк ва Луганск тан олинмаган республикалари расмийлари Украинани ўт очишни тўхтатиш келишувини бузган ҳолда ўқ узганликда айблаган.

Шу билан бирга, Оқ уй разведка маълумотларига таяниб Россия Украина билан чегарадан ўз қўшинларини олиб чиқмаётганини, аксинча, ўз ҳарбий контингентини ошираётганини маълум қилган.

Аввалроқ Ўзбекистон декабрь ойида энг кўп олтин сотиб олган давлатлар қаторига киргани хабар қилинганди.