Дунёдаги энг йирик самолёт ишлаб чиқарувчи Airbus компанияси бош ижрочи директори Гийом Фори CNBC телеканалига берган интервьюсида водород ёқилғисида ишлайдиган самолётлар ўрта ва узоқ муддатли истиқболда «асосий ечим» эканини айтди.

Топ-менежернинг сўзларига кўра, авиация соҳаси дунёда кетаётган «яшил» иқтисодиёт тенденциясига етиб олмаса, катта муаммоларга дуч келиши мумкин. Зеро, Бутунжаҳон табиатни муҳофаза қилиш жамғармаси маълумотларига кўра, авиация иссиқхона чиқиндиларининг энг кўп ўсиб бораётган манбаларидан бири ҳисобланади.

Сентябрь ойида Гийом Фори 2035 йилга келиб унинг компанияси водород ёқилғиси билан ишлайдиган самолётни ишга туширишни режалаштираётганини эълон қилганди

«Олдинда ҳали кўп ишлар турибди. Водороддан ёқилғи сифатида фойдаланиш учун физика қонунларини ўзгартиришимиз шарт эмас», — дейди Airbus бош ижрочи директори.

Шу билан бирга, жаноб Форининг фикрича, бу жараёнда нафақат техник ва молиявий жиҳатлар, балки тартибга солувчи органларнинг хатти-ҳаракати муҳим аҳамият касб этади.

Унинг таъкидлашича, 2027-2028 йилларга келиб компания регуляторлар Airbus’нинг авиация саноатига водород ёқилғисини жорий этиш бўйича ташаббусларини қўллаб-қувватлашга қанчалик тайёр эканига муайян ишонч ҳосил қилиши керак бўлади.

Маълумот учун, водород энергияси муқобил энергия ҳисобланади. Ушбу элемент ер юзаси ва космосда кенг тарқалган.

Аввалроқ дунё бўйича самолёт ишлаб чиқарувчи энг йирик компания номи маълум бўлганди.