Шавкат Мирзиёев 23 февраль куни Мўйноқ шаҳрига келди. Президент Орол денгизининг қуриган жойига бориб, вазиятни кўздан кечирди.

Президент 2018 йили Мўйноққа ташрифи чоғида олимлар билан маслаҳатлашиб, у ерда шўрга чидамли ўсимликлар экиш вазифасини белгилаган эди.

Давлат раҳбарига шу борада қилинган ишлар ҳақида ахборот берилди. Хусусан, ўтган йилларда денгизнинг сув қуриган қисмида 1 миллион 524 минг гектар тўқайзор барпо этилган. Бунинг учун саксовул, қорабўроқ, қандим, черкез каби чўл ўсимликларидан қарийб 6 минг тонна уруғ тайёрланиб, қийин шароитларда экилган. Бу ишларда 4 мингдан зиёд ишчи қатнашиб, 1600 дона техника, самолётлар жалб этилган.

Бу хайрли, долзарб ҳаракат давом эттирилмоқда. 2022 йилда 100 минг гектар майдонда «яшил қоплама» барпо қилиш режалаштирилган. Бугунги кунда шундан 26 минг гектарида иш бошланган, 562 тонна уруғлар тайёрланган. Шунингдек, 100 гектар майдонда кўчатхона ташкил қилинмоқда.

Президент бу ерда экологлар ва ўрмон хўжалиги мутахассислари билан суҳбатлашди.

«Биз шу мураккаб шароитда экиш бўйича катта тажриба орттирдик. Бу ерга ўзим келишимдан мақсад — энди бу ишларни илмий асосланган тарзда давом эттирамиз», — деди Шавкат Мирзиёев.

Қайд этилишича, Президент илмий изланишлар қилиб, ҳудуд тупроғига мос навлар яратиш, кейинги босқичда чорвачиликни ривожлантириш бўйича кўрсатмалар берган. Оролбўйининг флора ва фаунасини яхшилаш бўйича 5 йиллик миллий дастур ишлаб чиқиш вазифаси қўйилган.

Аввалроқ Орол денгизининг қуриган қисми йилига қанча иқтисодий зарар келтириши хабар қилинганди. Шунингдек, Президент Тошкент — Мўйноқ — Нукус авиақатнови йўлга қўйилишини айтгани ҳақида хабар берилди.