Яқин соатларда 2022 йилнинг 26 февраль санаси ҳам поёнига етади. Якунланаётган кун дунё ахборот майдонида жаҳон ҳамжамиятининг Россияга қарши чекловлари ҳақидаги янгиликлар билан ёдда қолди. Kommers.uz уларнинг энг сараларини битта дайжестга тўплади.

SWIFT’дан узиб қўйилиши кутилаётган Россия

АҚШ расмийлари Россия Украинада ҳарбий операция бошлаганидан кейин уни SWIFT банклараро маълумот алмашиш тизимидан узиб қўйиш масаласини кўриб чиқмоқда.

Американинг Bloomberg нашри ўз манбаларга таяниб қайд этишича, расмий Вашингтон бундай имкониятни жиддий кўриб чиқмоқда, чунки Европа Иттифоқи расмийлари Россияни SWIFT’дан узиб қўйишни истисно қилмаяпти. АҚШ Президенти Жо Байден маъмурияти расмийлари бу борада европаликлар билан ҳамкорликни муҳокама қилмоқда.

Агентликнинг икки манбаси таъкидлашича, Россияни SWIFT’дан узиш режалари тизимни назорат қилувчи орган сифатида фаолият юритувчи Федерал резерв билан муҳокама қилинмоқда. Бошқа бир суҳбатдошга кўра, Еврокомиссия билан бу мавзу бўйича музокаралар аллақачон бошланган. Ҳозирча бу масала бўйича якуний қарор йўқ.

Бир неча кун олдин Россияни SWIFT’дан узиш ғояси эҳтимолдан йироқ эди. Чунки 18 февраль куни Оқ уй Россия Украинага бостириб кирган тақдирда АҚШ санкциялари тўпламига SWIFT’дан узиш чеклови киритилмаслигини маълум қилганди.

Россия Донецк ва Луганск халқ республикалари мустақиллигини тан олганидан кейин Жо Байден унга қарши санкцияларни эълон қилар экан, чекловлар SWIFT тизимидан узилишдан кўра ёмонроқ оқибатларга олиб келишини айтганди.

SWIFT’дан узиш чораси Россиянинг Украинадаги ҳарбий операцияси бошланганидан кейин эълон қилинган АҚШ молиявий-иқтисодий санкцияларининг иккинчи қисмига ҳам киритилмаганди. Байденнинг айтишича, ўша пайтда Европадаги баъзи иттифоқчилар унинг Россияга қўлланилишига қарши бўлган, аммо энди Вашингтон ва Брюссель бу масалага қайтиши мумкин.

Маскдан ёрдам сўраган украиналик вазир

Украина рақамли трансформация вазири Михаил Федоров ёрдам сўраб, америкалик миллиардер ҳамда SpaceX ва Tesla компаниялари раҳбари Илон Маскга мурожаат қилди.

«Ҳурматли Илон Маск! Сиз Марсни колониялаштиришга уринаётган бир вақтингизда Россия Украинани мустамлака қилишга уринмоқда! Ракеталарингиз коинотдан муваффақиятли қўнаётган бир пайтда Россия ракеталари Украина болалар боғчаси ва шифохоналарини бомбардимон қилмоқда!», — дейди вазир.

Шунингдек, Михаил Федоров Илон Маскдан Украинани интернет билан таъминлашда ёрдам беришини сўраган.

«Бизга ёрдам керак Украинани Starlink станциялар ва сунъий йўлдош интернети билан имкон қадар тезроқ таъминлашингизни сўрайман. Шунингдек, Россия Федерациясига мурожаат қилинг, кўплаб фикрлайдиган россияликлар сизни ҳурмат қилади», — дейилади вазир хабарида.

«Челси»ни сотиб юбориши мумкин бўлган Абрамович

Спорт сармоядорлари ва инвестиция компаниялари, шу жумладан АҚШ компаниялари ҳозирда россиялик миллиардер Роман Абрамовичга тегишли бўлган Англиянинг «Челси» футбол клубини сотиб олиш бўйича потенциал таклифлар тайёрлашни бошлади.

Маълум бўлишича, инвесторлар расмий жараённи бошлашдан олдин Британия расмийларидан ҳозирги вазият бўйича аниқроқ маълумот кутмоқда.

«Аммо таклифлардан бири аллақачон ‘Челси’га юборилган», — деди Bloomberg манбаларидан бири. 

«Челси» матбуот котиби ҳамда Абрамовичнинг матбуот котиби изоҳ беришдан бош тортди.

Эҳтимолий таклифлар тафсилотлари, жумладан, потенциал миқдор тақдим этмайган. Аммо келишув Европа футболидаги энг йирикларидан бирига айланиши мумкин.

Маълумот учун, Роман Абрамович «Челси»ни 2003 йилда тахминан 190 миллион долларга сотиб олганди. 2021 йил Американинг Forbes журнали «Челси»нинг қийматини 3,2 миллиард долларга баҳолаб, клубни энг қиммат футбол жамоалари рўйхатида еттинчи ўринга қўйди.

Украинадаги жамоалари учун барча чораларни кўрадиган Apple

Apple бош директори Тим Кук унинг компанияси Украинага гуманитар ёрдам кўрсатишини ва маҳаллий жамоалар учун қўлидан келган барча ишни қилишини айтди.

Кукнинг қайд этишича, у Украинада содир бўлаётган воқеалардан жуда хавотирда.

«Ҳозир мен хавф остида бўлган одамлар ҳақида ўйлаяпман ва тинчликка даъват қилаётганларнинг барчасига қўшиляпман», — деб ёзади Кук.

Шу билан бирга, Apple раҳбари Россиянинг хатти-ҳаракатлари ва компания томонидан мамлакатга нисбатан қўлланилиши мумкин бўлган санкциялар ҳақида изоҳ бермади.

Кейинги постда Кук 24 февраль Стив Жобснинг ҳам туғилган куни эканини тилга олди. Apple компаниясининг амалдаги бош директори ўзининг «вақтдан оқилона фойдаланиш, мукаммалликка интилиш ва ўзидан кейин яхшироқ дунё қолдириш» чақириғини эслатди. Жобс кеча 67 ёшга тўлган бўларди.

Россиянинг самолётлари учун ҳаво ҳудудини ёпган мамлакатлар

Британия ортидан Эстония ва Латвия ҳам Россия авиакомпаниялари учун ҳаво ҳудудини ёпишга қарор қилди. Бунга қадар Польша, Чехия ва Болгария ушбу чекловни жорий қилганди.

«Эстония Польша ташаббусига қўшилади ва барча рус авиакомпанияларига бизнинг ҳаво ҳудудимиздан фойдаланишни тақиқлайди», дейди Иқтисодиёт ва инфратузилма вазири Таави Аас.

Таъкидланишича, Эстония ҳаво ҳудудини Россия авиакомпаниялари учун ёпиш режалаштирилган қарор тайёрланмоқда.

Бунга қадар Латвия Европа Иттифоқи билан Россия авиакомпаниялари учун ҳаво ҳудудини ёпиш масаласини муҳокама қилаётганини маълум қилганди. Болгария эса ҳаво ҳудудини барча рус самолётлари учун ёпишга қарор қилган.

Польша ва Чехия ҳам 26 февралдан Россия самолётлари учун ҳаво ҳудудини ёпишини маълум қилди.

Фаолияти тўхтаган Ўзбекистоннинг Украинадаги корхоналари

Ҳарбий ҳаракатлар шароитида Украинадаги барча Ўзбекистон корхоналари ўз фаолиятини тўхтатди. Ташқи ишлар вазирлигининг қайд этишича, 2022 йил 1 январь ҳолатига кўра, Ўзбекистон Республикасида Украина капитали иштирокидаги 173 та корхона фаолият юритаётган бўлса, шундан 96 таси қўшма корхона, 77 таси хорижий корхоналардир. 2021 йилда 38 та янги корхона ташкил этилди.