Миллиардер Алишер Усмоновнинг USM ҳолдинги «Капиталбанк» акцияларини сотди. Бу ҳақда банк матбуот хизмати хабар берди.

Қайд этилишича, «Капиталбанк» акцияларининг 61,54 фоизига биргаликда эгалик қилувчи «Телекоминвест» МЧЖ (РФ) ва «FINANCE TCI» МЧЖ (Ўзбекистон) устав капиталидаги 100 фоиз улушини сотиш бўйича битим тузди.

Таъкидланишича, битим «Капиталбанк» бизнесини биргаликда ривожлантиришдан манфаатдор бўлган хусусий инвесторлар гуруҳи ташаббуси билан тузилган.

Битимнинг тижорат шартлари ошкор этилмаган.

Эслатиб ўтамиз, USM Holding компаниясининг шўъба корхонаси бўлган «Телекоминвест» «Капиталбанк»нинг 2021 йилнинг ноябрь ойида «Капиталбанк»нинг 215,3 миллиард сўмлик акцияларини сотиб олганди.

Шунингдек, февраль они бошида Усмоновга алоқадор «Телекоминвест» «Капиталбанк»нинг 3,85 фоиз акциясини сотиб олганидан сўнг банкда компаниянинг аффилланган ҳолдаги умумий акциялари 61,54 фоизга етганди.

Аввалроқ, 29 октябрь куни Ойбек Ботирович Турсунов «Капиталбанк» акциядорлик тижорат банки устав капиталидаги 34,10 фоиз акцияни сотиб олганди. Шу билан банкдаги у эгалик қиладиган жами акциялар 50 фоизга етган. Фонд биржаси сайтида харид нархи бўйича маълумотлар келтирилмаган.

Битимдан сўнг банкда Ойбек Турсунов эгалик қиладиган акциялар сони 164 миллион 927 890 тага етганди.

Кейинчалик Ойбек Турсунов «Капиталбанк» аффилланган шахслари рўйхатидан чиқарилди.