«Катта тўртлик» аудиторлари PwC ва KPMG Россиядан чиқиб кетади. Бу ҳақдаги компаниялар баёнотлари Twitter’да эълон қилинди.

Маълум бўлишича, компаниялар Россия ва Беларусь бўлинмаларини ўз таркибидан чиқаради. Бўлимлар маҳаллий мижозлар ва ўз мамлакатларида жойлашган халқаро компаниялар билан ишлайди.

KPMG аудитори Twitter саҳифасида унинг Россия ва Беларусь бўлинмалари Россиянинг Украинага давом этаётган ҳарбий ҳужуми туфайли тармоқни тарк этишини айтди.

«KPMG Россия ва Белоруссияда 4500 киши ишлайди ва улар билан иш муносабатларимизни тугатиш жуда қийин, уларнинг аксарияти KPMG билан ўнлаб йиллар давомида ишлаган», дейилади компания баёнотида.

PwC, ўз навбатида, 3700 нафар ходимдан иборат Россия бўлими глобал тармоқни тарк этишини маълум қилди. Бироқ компания россиялик ҳамкасбларини қўллаб-қувватлаш учун барча саъй-ҳаракатларни амалга оширади.

«Россия компаниясининг мижозлар билан ишлаш тамойиллари ва қоидалари ўзгаришсиз қолади. Ишончимиз комилки, Россия фирмасининг бизнеси ривожланишда давом этади», — деган PwC глобал раиси Боб Мориц ўз баёнотида.

KPMG Россияни бир неча кун ичида тарк этади. PwC учун Россия бўлинмасининг глобал тармоқдан чиқиши силлиқ бўлади. Қайд этилишича, Россия бўлинмалари глобал тармоқлардаги собиқ ҳамкасбларидан тавсиялар олган ҳолда халқаро мижозларнинг маҳаллий аудити билан шуғулланиши мумкин бўлади.

Бундан ташқари, PwC’нинг Россия ва Беларусдаги мустақил бўлинмалари номи ўзгартирилади. Deloitte ва EY ўзларининг «Катта тўртлик» ҳамкасбларига эргашишлари мумкин.

«Ҳамма биладики, ўйин Россияда тармоқ фирмасини сақлаб қолиш нуқтаи назаридан бой берилди», — деди «Катта тўртлик»компаниялардан биридаги манба.

Аввалроқ JPMorgan Россияни 1998 йилдаги каби иқтисодий инқироз хавфидан огоҳлантиргани хабар қилинганди. Шунингдек, Жанубий Корея Россия Марказий банки билан молиявий операцияларни тўхтатгани ҳақида хабар берилди.