Ўзбекистонда январь ойидаги ишсизлик даражаси 9,6 фоизни ташкил этди. Бу ҳақда Бандлик ва меҳнат муносабатлари матбуот хизмати хабар берди.

Маълум қилинишича, Ўзбекистонда 2022 йилнинг 1 январь ҳолатида ишсизлик даражаси 9,6 фоизни ташкил этиб, 2021 йилнинг шу даврига нисбатан 0,9 фоизга камайган. Шу билан бирга, 2021 йилнинг январь-сентябрь ойларига нисбатан 0,2 фоизга ортган.

Қайд этилишича, 2021 йилнинг декабрь ойида Бандлик ва меҳнат муносабатлари вазирлиги ҳузуридаги Меҳнат бозори тадқиқотлари томонидан республиканинг 108 та шаҳар ва туманларида навбатдаги ижтимоий сўров ўтказилган. Тадқиқот давомида 500 та ўзини-ўзи бошқариш органлари, 5,0 мингта уй хўжаликлари ҳамда 26,5 минг нафар фуқаролар қамраб олинган.

Шунингдек, 2022 йилнинг 1 январь ҳолатида меҳнат ресурслари сони 19 миллион 345,0 минг кишини ташкил этиб, 2020 йилнинг шу даврига нисбатан 101,1 фоизга ёки 202,6 минг кишига ошган. Иқтисодиёт тармоқларида банд бўлганлар сони 13 миллион 538,9 минг кишини ташкил этиб, 2021 йилнинг мос даврига нисбатан 2,3 фоизга (299,3 минг кишига) ошган.

Бундан ташқари, 2022 йилнинг 1 январь ҳолатида расмий секторда банд аҳоли сони 6196,3 минг кишини ташкил қилиб, 2020 йилнинг шу даврига нисбатан юридик шахсларда банд бўлганлар сони 6,3 фоизга ёки 314,8 минг кишига ошгани кузатилди.

Норасмий секторда банд бўлганлар сони 5 миллион 885,5 минг кишини ташкил этиб, 2021 йилнинг 1 октябрь ҳолатига нисбатан 1,0 фоиз ёки 58,4 минг кишига камайган. Ўтказилган тадқиқот натижаларига кўра ишга муҳтож бўлганларнинг умумий сони 1 миллион 441,8 минг кишини, ишсизлик даражаси иқтисодий фаол аҳоли орасида 9,6 фоизни ташкил этди. 16–30 ёшгача бўлганлар орасида ишсизлик даражаси — 15,1 фоиз, аёллар орасида ишсизлик даражаси эса 13,3 фоиз бўлди.