Европада газ нархи рекорд даражада кўтарилиб, 4 минг долларга яқинлашди. Бу ҳақда «Интерфакс» ёзмоқда.

Маълумотларга кўра, 7 март куни эрталаб Европада газнинг спот нархи бир неча бор тарихий рекордларни янгилаб, минг куб метр учун 4000 долларга яқинлашди.

Жаҳон бозорида Россиянинг энергия ресурслари — нефть, кўмир, суюлтирилган газни етказиб бериш билан ноаниқлик кучаймоқда. Украина атрофидаги қийин вазиятга қўшимча равишда (бозор бу йўналишдаги хатарлар ҳар куни ўсиб бормоқда, деб ҳисоблайди), бу ҳафта Европада қайта тикланадиган манбалардан — шамолдан электр энергияси ишлаб чиқариш кескин пасайган.

ICE Futures биржаси маълумотларига кўра, 4 март кунги савдолар 2150 доллар билан якунланган бўлса, TTF ҳабидаги энг яқин (апрель) фючерслар нархи минг куб метр учун 3898 долларга етган. Февраль ойида TTF’да суюлтирилган газнинг ўртача нархи 935 доллар даражасида шаклланган.

«Газпром» эса европалик харидорларнинг аризалари бўйича Украина орқали ҳамда «Шимолий оқим» ва «Ямал-Европа» газ қувурлари бўйлаб мунтазам равишда экспортга газ етказиб беришда давом этмоқда. 7 март кунидан бошлаб «Ямал-Европа» яна реверс режимда ишламоқда, чунки Германиядан Польшага газ етказиб бериш талаби Польша орқали Германияга етказиб бериш номинациясидан сезиларли даражада ошиб кетди.

Аввалроқ «Шимолий оқим-2»ни ҳимоя қилиш фонди лойиҳани қўллаб-қувватлашдан бош тортгани хабар қилинганди. Шунингдек, жаҳон бозорлари Запорожье АЭСидаги ёнғин ҳақидаги хабардан сўнг тушиб, нефть нархи кўтарилгани ҳақида хабар берилди.