Марказий банкнинг маълум қилишича, Ўзбекистонда 2022 йилнинг йил июль-сентябрь ойларида кўчмас мулк олди-сотдиси бўйича 79,9 мингта шартномалар расмийлаштирилган. Қайд этилишича, ушбу кўрсаткич 2021 йилнинг мос даври билан солиштирилганда 20 фоизга ошган. Кўрсаткичнинг баланд бўлиши асосан август ва сентябрь ойларида тузилган шартномалар билан боғлиқ.

Ҳудудлар бўйича тақсимланганда энг юқори ўсиш кўрсаткичлари Хоразм (41 фоиз), Навоий (39 фоиз), Жиззах (32 фоиз) ва Қашқадарё (30 фоиз) вилоятларига тўғри келади. Шунингдек, Тошкент шаҳрида 2022 йилнинг июль-сентябрь ойларида ўтган йилнинг мос даврига нисбатан 18 фоизга кўпроқ шартномалар расмийлаштирилган.

Маълумотларга кўра, Ўзбекистонда кўчмас мулкни сотиб олиш, ижарага олишга бўлган қизиқиш асосан россиялик норезидентлар томонидан ўтган чорак бошидан сезиларли даражада ошган. Оқибатда бу қўшимча талаб ва нарх муҳитига нафақат жорий чоракда балки, келгуси давр учун ҳам босим ўтказиши мумкин.

Республикада август-сентябрь ойларида турар жойлар учун ижара нархларида ўсиш кузатилди. Июль ойида республика бўйича ижара нархлари вақтинчалик пасайди. Кейинги икки ой (август-сентябрь ойларида) ичида 17 фоизлик сезиларли ўсиш кузатилди.

Хабарда айтилишича, Тошкент шаҳри, Самарқанд, Фарғона ва Тошкент вилоятларида 1 квадрат метр учун ижара ҳақи сезиларли даражада ошган.

Иккиламчи кўчмас мулк бозори III чоракда 5,2 фоизга, йил бошидан буён эса 18,1 фоизга қимматлашди. Сурхондарё (-10,2 фоиз), Андижон (-3,1фоиз) ва Тошкент (-1,1фоиз) вилоятларини ҳисобга олмаганда барча ҳудудларда ўсиш кузатилди.

Июль ойида иккиламчи кўчмас мулк бозоридаги нархлар ўсиши секинлашган бўлса-да, сентябрь ойида сезиларли ўсиш кузатилди. Жумладан, хорижий сайёҳларнинг кириб келиши натижасида талабнинг ошиши, аҳолининг иккиламчи даромадлари, хусусан, трансчегаравий пул ўтказмаларининг кўпайиши, шунингдек қишлоқ хўжалиги пул тушумларининг ошиши билан боғлиқ мавсумий омиллар нархларнинг ошишига асос бўлмоқда.

Умуман олганда юқорида келтириб ўтилган сабаблар бирламчи бозорга ҳам ўз таъсирини ўтказмасдан қолмади. Янги турар жойларнинг нархи июль ойида 2,8 фоизга, августда 0,1 фоизга, сентябрда эса 2,5 фоизга ўсди.

Аввалроқ Тошкентда ижарачилар хорижликларнинг кўплаб келаётгани боис бир-икки хонали квартира нархларини 1 500 долларгача оширгани, шунингдек, сентябрь ойида Ўзбекистонга Россиядан 80 мингга яқин россиялик келгани ҳақида хабар қилинганди.