Меta 11 минг ходимини ишдан бўшатди
Мета компанияси раҳбари таъкидлашича, кучли рақобат ва рекламадан келадиган даромадлар камайиши фонида даромад пасайиб кетган
Meta раҳбари Марк Цукерберг компаниянинг 11 минг ходимини оммавий равишда ишдан бўшатди. Бу ҳақда компания расмий сайти хабар берди.
«Мен жамоамиз сонини тахминан 13% га қисқартиришга ва 11 мингдан ортиқ иқтидорли ходимларимизни ишдан бўшатишга қарор қилдим. Кучли рақобат ва реклама даромадларининг пасайиб кетиши бизнинг даромадимизни мен кутганимдан ҳам тушиб кетишига олиб келди», — деди Цукерберг.
Компания берган хабарга кўра, ишсиз қолган барча ходимларга 16 ҳафталик иш ҳақи, олти ой давомида уларнинг оилалари учун тиббий суғурта тўлови ва ишдан бўшатилгандан кейинги дастлабки уч ойда ишга жойлашишда ёрдам бериш ваъда қилинган.
Қайд этилишича, 2023 йилда компания харажатларини камайтиради.
Аввалроқ Meta йилнинг иккинчи чорагида виртуал реаллик учун 2,8 млрд доллар сарфлагани ҳақида хабар берилганди. Шунингдек, компания Марк Цукерберг номи билан виртуал валюта ишлаб чиққани хабар қилинган.
