Ўзбекистонда 250 та уй-жой мулкдорлар ширкати томонидан 20 миллиард сўм маблағлар талон-торож қилинган, 50 га яқин ширкат раҳбарига жиноий иш қўзғатилган. Бу ҳақда Уй-жой фонди инспекцияси раҳбари Азлар Содиқов маълум қилди.

Қайд этилишича, 1 декабрь ҳолатига уй-жой фонди инспекцияси томонидан кўп квартирали уйларни сақлаш ва уларни бошқаришни назорат қилиш бўйича 5 та йўналишда амалга оширилган бажарилган. Хусусан, кўп квартирали уйларга хизмат кўрсатувчи жами мингга яқин бошқарув органлари фаолияти ўрганилган. Ўрганиш натижаларига кўра, 250 та уй-жой мулкдорлар ширкатлари томонидан жами 20 миллиард сўм маблағларни талон-торож ёки уй-жой мулкдорларига зарар етказганлиги аниқланган. Шундан, 50 га яқин ширкат раҳбарларига нисбатан жиноий ишлар қўзғатилиб 700 миллион сўмга яқин маблағлар ширкатлар хисобига қайтарилган.

Шунингдек, кўп квартирали уйлар ва уларга тегишли туташ ҳудудларда олиб борилган таъмирлаш-тиклаш ишлари ўрганилганда жами қиймати 14 миллиард сўм миқдорда 57 та қонун бузилиш ҳолатлари аниқланган. Ҳозирда пудрат ташкилотларига нисбатан жиноий ишлар қўзғатилган.

Кўп квартирали уйларнинг бошқарув органлари томонидан йиғиладиган мажбурий бадаллар маблағларининг шаффофлигини таъминлаш юзасидан ташкил этилган «Менинг уйим биллинг» тизими орқали хисоб юритилишини таъминлаш мақсадида махсус штаб ташкил этилган бўлиб, 3 ой мобайнида 1500 та мурожаатлар қабул қилинган. Уларнинг 1200 таси жойида ижобий хал этилган, 200 тасига нисбатан мажбурий кўрсатмалар берилган, 100 га яқин ширкатлар бошқарув қоидаларини бузганлиги учун 300 миллион сўм миқдорда маъмурий жарималар қўлланилган.