2023 йилнинг 6 февраль куни ҳам ниҳоясига етмоқда. Kommers.uz якунланаётган кун Ўзбекистон ва дунёда содир бўлган воқеаларнинг энг сараларини битта дайжестга тўплади.

Тадбиркорларнинг солиқ қарзига пеня ҳисоблаш 1 апрелгача тўхтатилди

«Ҳаво ҳарорати кескин совиб кетишининг иқтисодиётга салбий таъсирини камайтириш учун тадбиркорлик субъектларини қўллаб-қувватлаш чора-тадбирлари тўғрисида»ги Президент қарори қабул қилинди.

Қарорга кўра, тадбиркорларнинг 2023 йил 1 январга нисбатан 1 февраль ҳолатига ошган (ҳосил бўлган) солиқ қарзини 2023 йил 1 мартдан 1 июлгача фоизларсиз, қўшимча шартлар қўймасдан ва таъминот талаб этмасдан тенг улушларда бўлиб-бўлиб тўлашга рухсат берилади.

Шунингдек, ташқи савдо операциялари бўйича муддати ўтган дебитор қарздорлик учун хўжалик юритувчи субъектларга 2023 йил 1 апрелгача жарималар қўлланилмайди.

Тадбиркорлар 2022 йил декабрь ва 2023 йил январь-февраль ойларида давлат мулкидан фойдаланганлик учун ижара тўловларини 2023 йил 1 мартдан 1 июлгача тенг улушларда бўлиб-бўлиб тўлаши мумкин.

Шу билан бирга, тадбиркорлар томонидан бўлиб-бўлиб тўлаш шарти билан сотиб олинган давлат активлари бўйича 2022 йил декабрь ва 2023 йил январь ойларида тўланиши лозим бўлган тўловлар, шу жумладан, дастлабки тўлов тўланмаганлиги учун фоизлар ва пенялар ҳисоблаш 2023 йил 1 апрелгача тўхтатиб турилади.

Ҳаво ҳароратининг кескин совиб кетиши оқибатида қийинчиликларга дуч келган тадбиркорларга нисбатан 2023 йил 1 апрелгача давлат фойдасига ундирувлар билан боғлиқ суд ҳужжатлари ва бошқа органлар ҳужжатларининг мажбурий ижроси тўхтатилади.

Қарорга кўра, тадбиркорларга ҳаво ҳароратининг кескин совиб кетиши оқибатида носоз ҳолга келган асосий воситаларни таъмирлаш учун ажратилган кредитлар бўйича кредит суммасининг 50 фоизигача (50 фоизи ҳам киради), лекин умумий қиймати 2,5 миллиард сўмдан ошмаган миқдорда кафиллик берилади.

Қашқадарёда «Агробанк» филиали мансабдорлари қарийб 4 млрд сўмни талон-торож қилгани айтилмоқда

«Агробанк» АТБ Қашқадарё вилоят бошқармаси Қамаши филиали мансабдор шахслари жиноий тил бириктириб, ўзига ишониб топширилган маблағларни ўзлаштириш ва растрата қилиш йўли билан талон-торож қилган. Бу ҳақда вилоят прокуратураси матбуот хизмати хабар берди.

Uznews’нинг маълум қилишича, талон-торож қилинган сумма қарийб 4 миллиард сўмни ташкил этади.

Мазкур ҳолат юзасидан ИЖҚҚ департаменти Қашқадарё вилоят бошқармаси томонидан Жиноят кодексининг 167 (ўзлаштириш ёки растрата йўли билан талон-торож қилиш) ва 209-моддалари (мансаб сохтакорлиги) билан жиноят иши қўзғатилиб, дастлабки тергов ҳаракатлари вилоят прокуратураси томонидан олиб борилмоқда.

Вилоят прокуратурвсига кўра, тергов давомида 3 нафар мансабдор шахсга нисбатан қамоққа олиш тарзидаги эҳтиёт чораси қўлланилган.

«Терговнинг бориши алоҳида назоратга олинган. Тергов якуни бўйича батафсил ахборот берилади», дейилади хабарда.

Ўзбекистон ва Малайзия олтин қазиб олиш бўйича ҳамкорлик қилади

Ўзбекистоннинг Куала-Лумпурдаги элчихонаси вакиллари ва Малайзиянинг Паханг штати Администрацияси Инвестициялар ва хусусийлаштириш бошқармаси бошлиғи Ҳаслина бинти Баҳасан ўртасида онлайн-мулоқот бўлиб ўтди.

Маълумот учун, мазкур штат пальма ёғи ва каучук маҳсулотининг энг йирик экспортчиси, шунингдек, ҳудудда сабзавот ва гуруч етиштирилади. Саноат, асосан, қишлоқ хўжалиги хом-ашёсини жумладан, пальма ёғи, каучук, ёғочни қайта ишлаш, шунингдек, нефть-кимё ва олтин қазиб олишга ихтисослашган.

Шунингдек, Паханг штати Малайзиянинг шарқий соҳилидаги (East Coast Economic Region) махсус иқтисодий зонанинг транспорт ва саноат маркази ҳисобланади. Автомобилсозлик саноати ривожланган. Штатда DRB-HICOM, DefTech, Isuzu, Mercedes-Benz, Volkswagen ва Suzuki каби компаниялар фаолият юритади. Шунингдек, мазкур ҳудудда интеграциялашган нефть-кимё мажмуаси, Малайзия-Хитой саноат парки, «Паханг» технопарки ва «Гамбанг» ҳалол парки жойлашган.

Учрашувда томонлар ўртасида ўзаро иқтисодий ҳамкорлик масалалари муҳокама қилинди. Хусусан, Малайзия томони Ўзбекистоннинг кон-металлургия саноатидаги, айниқса, олтин қазиб олишдаги улкан тажрибасидан келиб чиқиб, кончилик соҳасида лойиҳаларни ишлаб чиқиш ва ўзаро тажриба алмашиш истагини билдирди.

Шунингдек, Паханг штати вакили ипакчилик соҳасида ҳамкорлик қилишдан ўзаро манфаатдорлигини билдирди.

Музокаралар натижасида Паханг штати ва мамлакатимизнинг тармоқ вазирлик ва идоралари ўртасида ҳамкорлик истиқболларини муҳокама қилиш бўйича онлайн-тадбир ўтказишга келишилди.

Франция Тошкентдаги қатор объектларга қуёш панеллари ўрнатади

Тошкент шаҳар ҳокимининг биринчи ўринбосари Ҳотамбек Шакиров, ҳоким ўринбосари Шароф Раҳманов 3 феврал куни EDF департаментининг Марказий Осиё бўйича директори Эммануэл Чевеннемент, EDF’нинг бизнес бўйича катта менежери Анна Шараева ва Ўзбекистондаги бош директори Пьер Пол Антенисенс иштирокида учрашув ўтказилди.

Мазкур учрашувда муқобил энергия манбаларидан фойдаланиш, хусусан, ҳудуддаги қатор объектларга қуёш панелларини ўрнатишга қаратилган лойиҳа доирасидаги ишлар кўриб чиқилган.

Франция томонининг маълум қилишича, бугунги кунда лойиҳанинг техник, иқтисодий ва ҳуқуқий ҳужжатлари такомилига етказилмоқда. Шу билан бирга ушбу узоқ муддатли, кенг кўламли лойиҳани биргаликда амалга ошириш учун ҳамкорлик қилиши мумкин бўлган компаниялар кўриб чиқилмоқда.

«Учрашув якунида томонлар амалий мулоқотлар давом этишини билдирди», дейилади хабарда.

Антикоррупция агентлиги Амрилло Иноятовнинг гапларини коррупцияга қарши курашиш сиёсатига зид ҳаракат деб баҳолади

Ижтимоий тармоқларда шифокорларнинг шароитини яхшилаш коррупциянинг олдини олишга хизмат қилиши тўғрисидаги таклифга соғлиқни сақлаш вазирининг «Беморга меҳр билан қарасангиз, рози бўлиб, ўзи сизга ‘баракасиниʼ бериб кетади» мазмунида билдирган муносабати муҳокамаларга сабаб бўлди. Мазкур ҳолатга Коррупцияга қарши курашиш агентлиги ҳузуридаги Жамоатчилик кенгаши муносабат билдирди.

Маълум қилинишича, Жамоатчилик кенгаши Соғлиқни сақлаш вазирлиги раҳбариятининг коррупциянинг олдини олиш бўйича бошлаган ишларини қўллаб-қувватлайди.

Шу билан бирга, шифокорларни рағбатлантириш йўлларидан бири сифатида беморлар берган маблағнинг эътироф этилишини қонунчиликка ва мамлакатда олиб борилаётган коррупцияга қарши курашиш сиёсатига зид ҳаракат сифатида қайд этади.

«Мазкур таклиф тизимда коррупциявий жиноятлар сонининг ортишига ҳамда шифокор касби мавқеининг пасайишига, соғлиқни сақлаш тизимига халқнинг ишончи камайишига сабаб бўлади», дейилади хабарда.

Коррупцияга қарши курашиш агентлиги, Соғлиқни сақлаш вазирлиги ва Давлат хизматини ривожлантириш агентлигининг қўшма баёнотида «Тиббиёт ходимларига муносиб меҳнат шароитини яратиш ва даромадини ошириш, шунингдек, уларнинг ижтимоий ҳимоясини кучайтириш бўйича амалий чоралар кўриш, бунда, тиббиёт ходимлари малакасига, кўрсатиладиган тиббий хизмат ҳажми, мураккаблик даражаси ва сифатига қараб меҳнатга ҳақ тўлашнинг тоифаланган замонавий механизмларини жорий этиш» белгиланган.

Шунингдек, Жамоатчилик кенгаши шифокорларни рағбатлантиришда беморлардан пул олиш сингари (ихтиёрий ёки ихтиёрий эмаслигидан қатъий назар) ноқонуний хатти-ҳаракатларни бартараф этиш ҳамда ҳақ тўлашнинг тоифаланган механизмини жорий этиш Соғлиқни сақлаш вазирлигининг асосий мақсади бўлиши лозимлигини билдиради.

Дунёда нима гаплар?

АҚШ Туркия банкларини санкциялар хавфидан огоҳлантирди

АҚШ Молия вазирлигининг терроризмга қарши кураш ва молиявий разведка бўйича ўринбосари Брайан Нельсон Истанбулга ташрифи чоғида турк банкларини Россия билан савдо ҳамкорлиги ривожланиши сабабли санкциялар хавфи ҳақида огоҳлантирди. Тегишли баёнот АҚШ Молия вазирлиги сайтида эълон қилинди.

«Турк корхоналари ва банклари Россия ҳарбий саноат комплексида ишлатилиши мумкин бўлган иккиламчи технологияларни етказиб берувчи транзакцияларни амалга оширмаслик бўйича қўшимча чоралар кўриши лозим. Ўтган йил давомида Туркиянинг Россияга экспорти ёки реэкспортининг сезиларли даражада ўсиши мамлакат банклари ва компаниялари санкцияга тушиши ва G7 бозоридан маҳрум бўлишига сабаб бўлиши мумкин», дейилади баёнотда.

Шунингдек, Нельсон санкция хавфини юмшатиш учун молия институтларини «Россия юридик ва жисмоний шахслари билан операциялар бўйича кенгайтирилган текширув ўтказишга» чақирди.

Bloomberg агентлигининг хабар беришича, Қўшма Штатлар Туркия билан музокаралар чоғида Анқарадан Москвага маҳсулот етказиб беришни тўхтатишни талаб қилган, чунки у гўёки унга махсус ҳарбий операция ўтказишда ёрдам беради.

Kommers.uz энг қайноқ янгиликларни ишончли тарзда етказишда давом этади.